«Павлодар мұнай-химия зауыты» ЖШС-де «Эр Ликид Мұнай Тех Газы» ЖШС меншігіндегі сутегі өндіру қондырғысынан ақау табылып, дизель отынының өндірісі уақытша тоқтаған еді, деп хабарлайды @Pavlodarnews.kz.

Серіктестіктің мәлімдеуінше, 10 ақпанда сутегі өндірісінің көлемі төмендеп, технологиялық газды сутегі өндіру қондырғысының бу риформингінің пешіне тасымалдайтын құбырдың дәнекерлеу тігісінде табылған ақауды жою бойынша жөндеу жұмыстары басталды.

- 13 ақпанда жөндеу жұмыстары аяқталып, сутегі өндіру қондырғысында іске қосу шаралары басталды. 14 ақпанда дизель отынының өндірісі қайта жанданады, - делінген хабарламада.

Ақау табылған уақытта ПМХЗ-да дизель отынының қоры 20 мыңнан астам тонна еді.

Бұл кәсіпорынға жөндеу жұмыстары аяқталғанша жоспар бойынша тәулігіне 5 мың тоннаға дейін жөнелтуге мүмкіндік береді.

Зауытта автобензин өндірісі қалыпты, өнім жоспар бойынша жөнелтілуде – тәулігіне 5,5 мың тоннаға дейін.

Сутегі өндіру қондырғысы тоқтап тұрған кезде жиналған мұнай өнімдерінің құрамдауыштары наурыз айында тауар өнімі болып өңделеді.

Осылайша ПМХЗ көктемдегі егіс дала жұмыстары басталғанда дизель отыны өндірісінің жоспарлы көлемін қамтамасыз ететін болады.