Павлодарлық «Ертіске» арнайы автобус сыйға тартылды

Фото: Валерий Бугаев

Демеушілікті №1 автобус паркі көрсетті, деп хабарлайды @Pavlodarnews.kz тілшісі.

Облыс әкімі Асайын Байханов өзінің Telegram-арнасында қалаға тағы 12 жаңа автобус жеткізілгенін мәлімдеді. Олар сұранысқа ие 003 бағытқа жіберіліп, қозғалыс аралығы 10 минуттан 8 минутқа дейін қысқарады.

– Осылайша, Павлодарда тасымалдаушы компаниялардың жылжымалы құрамын жаңарту жалғасуда, ал, қаладағы жаңа автобустардың саны 181-ге жеткізілді. Келесі жылы тағы 45 автобус сатып алу жоспарлануда, – деп жазды өңір басшысы.

Сонымен қатар, «Ертіс» футбол клубының ойыншылары жаңа жайлы автобустың кілтін алды. Оны жоғары әлеуметтік жауапкершілік танытып, демеушілік көрсеткен «№ 1 автобус паркі» ЖШС сатып алды. Көлік ақ-көк түстермен безендірілген. Машинаның борттарында клубтың логотипі мен команданың чемпиондық жылдары бейнеленген.

– Аты аңызға айналған клубтың 60 жылдық мерейтойы қарсаңында бұл өте лайықты сыйлық. Енді біздің сүйікті командамызда жалға алатын емес өздерінің «Yutong» маркалы автобусы бар. Автобуста шалқаймалы орындықтары және аяққа арналған жастықтарымен 43 орын бар, жолаушыларға жайлы болу үшін кондиционерлер, тоңазытқыштар және тағы басқалары орнатылған, – деп атап өтті Асайын Байханов.

Өңір басшысы өткен жылы жігіттердің екінші лиганың чемпиондары атанып, маусымды бірінші лигаға шығумен аяқтағаны мақтануға тұрарлық екенін айтты. Сондай-ақ, ол 2025 жылдың басты міндеті – Премьер-лигаға оралу екенін ерекше атап өтті. Асайын Байханов футболшыларға осы автобуспен сырт алаңдағы ойындардан тек жеңістер әкелуді тіледі.

– «Ертіс» жай ғана клуб емес, бұл – футбол тарихы, Павлодардағы спорт тарихы. Бірнеше буын жерлестеріміз «Ертіс» үшін жанкүйер болып өсті, оның ішінде мен де бармын. Сондықтан біз үшін футболшылардың қауіпсіздігі мен басқа қалалардағы матчтарға жайлы баруы маңызды. Біз, павлодарлықтар, сіздерден тек сапалы ойын мен жеңістер күтеміз. Жас балалар сіздерге қарап бой түзеп, «Ертіс» үшін ойнауды армандауы керек! – деп атап өтті өңір басшысы футболшылармен өткен кездесуде.

Руслан Есімов облыс әкіміне және қалалық автобус паркіне командаға аса қажет заманауи автобус сыйлағаны үшін алғысын білдірді. Ол 2025 жылы бұл автобус Павлодарға сырт алаңдардағы жеңістерден көп ұпай алып келетініне сенім білдірді.