Астаналықтар көрмені 10 тамызға дейін тамашалай алады, деп хабарлайды @Pavlodarnews.kz тілшісі.

Астана қаласы ҚР Президенттік орталығында Үндістанның Қазақстандағы елшілігі жанындағы Свами Вивекананда атындағы мәдени орталықтың қолдауымен «Unifying ART: Kazakhstan – India» акварель жұмыстарының халықаралық көрмесі, Павлодар қаласының «Немалевичи» акварель шеберханасы және Үндістанның Курукшетра университеті профессоры Рам Виранжанның акварельдері ашылды.

Үндістанның Қазақстандағы елшісі Нагендра Прасад, жеті мемлекеттің –  Израиль, Португалия, Австрия, Ирак, Кувейт, Ватикан, Бразилия елшілерімен және Қазақстанның басқа да жоғары лауазымды тұлғаларымен бірлесіп көрме ашты.

Көрменің негізгі мақсаты бай тарихи және рухани мұрасы бар Қазақстан-Үндістан қатынастарының екіжақты мәдени байланыстарын дамыту болып табылады.

Үндістаннан келген профессор мен павлодарлық суретшілер елордада 90 акварельді кескіндеме жұмыстарын ұсынды. 

3-4 шілдеде Астанада өтетін Шанхай Ынтымақтастық ұйымының саммиті аясында және келушілердің жоғары бағалауы нәтижесінде көрмені 10 тамызға дейін ұзарту туралы шешім қабылданды.