Бұл мақсатқа 182 миллион теңге бөлінген, деп хабарлайды @Pavlodarnews.kz.

Облыс әкімі Асайын Байханов Железин ауданына жұмыс сапары барысында  Веселая роща жалпы орта білім беру мектебінде болды. Аудандық білім беру бөлімінің басшысы Нұрлан Қапаров биыл «Ауыл – ел бесiгi» бағдарламасы бойынша  аталған білім ордасында күрделі жөндеу жұмыстары жүргізілетінін атап өтті. 

– Білім ордасының төбесі мен электр желілері ауыстырылып, мектеп аумағы абаттандырылады,  су құбыры мен жылумен жабдықтау жүйесі жөнделеді. Мемлекеттік сатып алу арқылы конкурс жарияладық. Нәтижесін күтіп отырмыз, – дейді Нұрлан Қапаров.

Мектеп директоры Жанна Бектасова биыл тіпті, қатты аяз кезінде ең суық кабинетті  жауып тастауға тура келгенін айтады. 

– Күрделі жөндеуден кейін жылы болады деп үміттенеміз. Жылу жүйесінің толық ауыстырылатындығына өте қуаныштымыз. Бұл – біз үшін ең үлкен мәселе. Осы мәселе бойынша қамқоршылық кеңесіне де хат жазған болатынбыз.  Суық кездері алауошақ қосқымыз келген едік, бірақ оған  электр желілері жүктемені көтере алмайды. Розеткалар балқып кетеді, – дейді Жанна Бектасова.

Ал шағын орталықтың тәрбиешісі балаларға дамыту ойыншықтары бөлінсе екен деген тілек білдірді. 

– Мектептің салқын екеніне қатысты шағымдар түсті. Сондықтан облыс бойынша  «Ауыл – ел бесігі» бағдарламасы аясында қаражатты үнемдеп,  182 миллион теңге қаржы бөлінді. Балаларға  жайлы орта құру керек, – дейді Асайын Байханов.  

Веселая роща жалпы орта білім беру мектебінде 157 оқушы білім алады. Оның ішінде 119-ы 1-11-сыныптардың оқушылары, 32 бала шағын орталыққа және алты бала мектепке дейінгі дайындық сыныбына барады.