Тінту барысында күдіктіден кептірілген марихуана тәркіленді, деп хабарлайды @Pavlodarnews.kz тілшісі.

Павлодар облысында ұйымдасқан қылмысқа қарсы күрес жөніндегі жедел қызметкерлер аса ірі мөлшердегі есірткі заттарын өткізу фактісінің жолын кесті.

Іс-шара прокуратура органдарының үйлестіруімен жүргізілді. Жедел іздестіру шаралары барысында Павлодар қаласында есірткі заттарын өткізді деген күдікпен екі жергілікті тұрғын ұсталды.

Күдіктілердің тұрғылықты жерлерінде және басқа да тиісті орындарда тінту іс-шаралары жүргізілді. Тінту барысында полиция қызметкерлері жалпы салмағы шамамен 60 келі болатын кептірілген марихуана есірткі затын анықтап, тәркіледі.

Сонымен қатар, күдіктілерден ақша қаражаты, ұялы телефондар, банк карталары және есірткі заттарын сақтауға әрі өткізуге пайдаланылуы мүмкін түрлі құрал-жабдықтар табылды.

– Тінту іс-шаралары барысында ұсталған азаматтардан жалпы салмағы шамамен 60 келі болатын «кептірілген марихуана» есірткі заты, ақша қаражаты, ұялы телефондар, банк карталары және түрлі құрал-жабдықтар табылып, тәркіленді, – деді Павлодар облысы полиция департаменті ұйымдасқан қылмысқа қарсы күрес басқармасының бастығы Ғабит Қабдрахманов.

Қазіргі уақытта аталған факті бойынша тиісті тергеу және жедел іс-шаралар жалғасуда. Соттың санкциясымен күдіктілер қамауға алынды.

Полиция қызметкерлері ұсталған азаматтардың осыған ұқсас басқа да қылмыстарға қатыстылығын тексеріп жатыр. Сондай-ақ есірткі заттарының қайдан алынғаны, қандай мақсатта сақталғаны және оны өткізудің ықтимал арналары анықталуда.

Құқық қорғау органдары есірткі заттарының заңсыз айналымына қатысты қылмыстардың жолын кесу бағытындағы жұмыстарды жалғастыруда. Есірткі заттарын сақтау, тасымалдау және өткізу фактілері қолданыстағы заңнама аясында қатаң түрде тоқтатылатынын атап өтеміз.

Павлодар облысының полиция департаменті есірткінің заңсыз айналымына қарсы күрес өңірдегі қоғамдық қауіпсіздікті қамтамасыз етудің маңызды бағыттарының бірі екенін еске салады.