Жалпы облыс бойынша Білім күні мектеп табалдырығын 12 мың бала аттады, деп хабарлайды @Pavlodarnews.kz тілшісі.

Мерекелік іс-шара №7 жалпы орта білім беру мектебінде де өтті. Білім ордасының директоры Мұрат Асайынов оқушылар, ата-аналар мен ұстаздарды осынау маңызды күнмен құттықтады.

- Жаңа оқу жылы бәрімізге жаңа жемістер мен жаңа жеңістер әкелсін. Жағымды жаңалықтарымыз көп болсын. Мектеп табалдырығын аттаған бірінші сынып оқушыларының қадамдары оң болсын. Биылғы жылы біздің мектеп контингенті 130 оқушыға өсті, яғни қазақ мектебіне деген сұраныс артты, - деді Мұрат Асайынов.

Мектеп директорының оқу ісі жөніндегі орынбасары Мадина Мұсабекова айтқандай, биыл бес бірдей бірінші сынып ашылды. Мектеп контингенті 760 балаға дейін өскен. Оқу ордасында шахмат, тоғызқұмалақ, күрес, домбыра, хореография, пәндік үйірмелер жұмыс істейді.

- Баламыз биыл екінші сыныпқа ауысты. Мектебіміз өзімізге ұнайды. Жаңа оқу жылында баламыз білімін шыңдай түседі деп сенеміз, - деді екінші сынып оқушысы Арслан Ғалымбектің анасы Әлия Ерғалиқызы.

Жалпы облыс бойынша 2023-2024 оқу жылы мектеп табалдырығын 115 мың оқушы аттады. Бұл былтырғы көрсеткішпен салыстырғанда мың балаға артық. Бірінші сыныпқа 12 мың бала қабылданды. 11 сыныпта 4 423 түлек оқиды.

Фото: автор