Атопиялық дерматит – қайталанатын, өршуге бейім ауру. Оны дұрыс және тиімді емдеу өте маңызды. Бұл ретте @Pavlodarnews.kz тілшісі аллерголог дәрігерден ауруды емдеуде назарда ұстау керек қағидаларды сұрастырып білді. 

Атопиялық дерматит – терінің мультифакторлы, созылмалы қабыну ауруы. Ол құрғақ тері, қышу, қызару, бөртпелер, сулы жаралар, қабыршақтану, терінің қатаюымен көрінеді. 

Әдетте алғашқы көріністер 3-6 айдан бастап мектеп жасына дейін пайда болады. Бұл ауру барлық балалардың шамамен 20 пайызында байқалады. Осыған қарамастан, ауру ересектерде де кездеседі: шамамен бес-жеті пайызында.

– Генетикалық ерекшеліктерге байланысты атопиялық дерматит тұқым қуалауы мүмкін. Егер баланың туыстарында аллергия , поллиноз немесе астма болса, бала туғанда атопиялық дерматит болу қаупі артады. Алайда, аллергиялық аурулары бар отбасында аллергиясы жоқ бала, сондай-ақ бұл аурулар жоқ отбасында ерекше терісі бар нәресте тууы мүмкін, – дейді облыстық балалар ауруханасының аллерголог дәрігері Әйгерім Тулеуғазинова.

АУРУДЫҢ КӨРІНІСТЕРІ

Атопиялық дерматиттің (АД) алғашқы көріністері пайда болған кезде маманға, учаскелік педиатрға, аллергологқа немесе дерматологқа бару керек. Себебі, АД – қайталанатын өршуге бейім ауру. Теріні сауатты күту және оған ұқыпты қарау эпидермистің тосқауыл функцияларын ішінара қалпына келтіріп, ауруды ремиссияға әкелуі мүмкін. 

– Терідегі филаггрин ақуызының жетіспеушілігі атопиялық дерматиттің дамуының негізгі себебі болып табылады. Атопиялық дерматитпен бірге жүретін паразиттік ауру болуы мүмкін, бірақ бұл оның пайда болу себебі емес, – дейді аллерголог дәрігер. 

Атопиялық дерматит жағдайларының тек 30 пайызы тағамдық аллергиямен байланысты, бірақ бұл жағдайда да аллергия АД-тің негізгі себебі емес, ал өршу триггерлерінің бірі болып табылады. Аллергологияда бұл аллергендердің үлкен сегіздігі деп аталады: сүт, жұмыртқа, бидай, балық, теңіз өнімдері, соя, бұршақ, жержаңғақ. Сол себепті, АД кезінде диета айқын реакциялар болған жағдайда ғана сақталуы керек.

ЕМДЕУ ШАРАЛАРЫ МЕН ТӘСІЛДЕРІ 

– Егер балада атопиялық дерматит көріністері болса, онда жағдайдың нашарлауына әкелетін триггерлерден аулақ болған жөн. Мысалы, ыстық, құрғақ ауа, терлеу, кейбір тамақ және ингаляциялық аллергендер , қатты, тығыз маталар (жүн , синтетика), тығыз киім кию, төмен ылғалдылық ( әсіресе жылыту маусымында), күйзеліс, – деді спикер. 

Ақ халатты маман, сондай-ақ, ұсыныстарды сақтаудағы ылғалдандыратын косметиканы жеткіліксіз пайдалану, өршу кезеңінде гормоналды кремдерді қолданудан қорқу үлкен қате болып табылатынын атап өтті.

Тері күтімі негізінен сыртқы құралдарды қолданудан тұрады, өйткені атопиялық дерматит терінің ауруы, сондықтан ол ішекті тазартуды қажет етпейді. 

Дәрігердің айтуынша, атопиялық дерматитті емдеудің негізі –  сыртқы құралдарды дұрыс қолдану. Яғни, эмоленттер, емдік гормоналды жақпа және кальциневрин ингибиторларына негізделген құралдар. Шомылу да маңызды болып табылады. Атап айтқанда, жылы сумен және бейтарап рН бар жұмсақ сусабындарды қолданған жөн. Суға түскеннен кейінгі алғашқы үш минут ішінде эмолент жағу маңызды. Дәрі-дәрмектерді қолданудың көптігі, көлемі де үлкен рөл атқарады. 

– Теңдестірілген тамақтану, жеткілікті су ішу, ылғалдандырғыштарды қолдану (әсіресе жылыту маусымында), күн сәулесі денедегі құрғақтықты арттыратындықтан күннен қорғайтын кремдерді жағу басты қағидаларға жатады. Егер атопиялық дерматиттің тамақ факторымен байланысы байқалса, онда тамақ күнделігін жүргізу керек. Содан кейін аллергодиагностика жүргізу үшін аллергологқа көрсеткен жөн, – дейді Әйгерім Тулеуғазинова.

Атопиялық дерматитпен ауыратын балаларда аллергияның даму қаупін азайту үшін қос экспозиция теориясы бар: егер балаға қосымша тағамдарды енгізу кезеңінде (мұны төртінші айдан бастап жасау ұсынылады) көп кездесетін аллергендермен таныстырса, тамақ молекулалары асқазан-ішек жолдарының шырышты қабығына еніп, иммундық жүйенің жасушалары дұрыс таниды, нәтижесінде аллергия ықтималдығы төмендейді. 

Дегенмен аллерголог тері бөртпелерінің алғашқы көріністері пайда болған кезде маманмен кеңес береді.