Әлеуметтік желі пайдаланушылары сенбей, туындыны ЖИ жасаған деп ойлап қалған, деп хабарлайды @Pavlodarnews.kz тілшісі.

Қолдан тігілген ерекше көйлек туралы видео Instagram желісінде 1,6 миллионнан астам қаралым жинады.

Павлодарлық блогер Толғанай Рахманқұлова үлкен қызына арнап тіккен үлпілдек көйлек Малайсары батыр атындағы мектепте өткен күзгі кештің есте қаларлық образдарының біріне айналды. Ол әдеттегі мата мен жылтыр әшекейлердің орнына қап мата, кепкен қамыс, бүрлер мен жасанды жапырақтарды пайдаланған.

Күзгі көйлек түсірілген видео әлеуметтік желі қолданушыларын тәнті етіп, көпшіліктің таңданысын тудырды. Алайда кейбіреулер мұндай көйлекті қолдан тігуге болатынына сенбей, оны жасанды интеллект жасаған деп болжаған. Осыдан кейін Толғанай материалдарды сатып алудан бастап, соңғы бұтақтарды жапсыруға дейінгі жұмыстың кезеңдерін көрсететін тағы бір видео түсірді.

Үш баланың анасы ерекше көйлекті жасауға екі күн мен екі түнін жұмсаған. Сөйтіп, көздің жауын алатын киімнің артында нейрожелі немесе дүкеннен сатып алынған дайын костюм емес, тынымсыз қол еңбегі тұрғаны белгілі болды.

«Маған күзгі стильде үлпілдек көйлек тігуді жоспарладық. Бірінші күні материалдарды сатып алдым. Белдемшенің негізі – кез келген мата және тігін керек-жарақтары дүкенінен табуға болатын кәдімгі қап мата. Содан кейін табиғи материалдар – үлпілдек кепкен қамыс пен бүр жинауға шықтық. Алғашқы кеште баскиімін жасадым. Пластик негіз бен пластик хомуттар сатып алдым. Барлық бөлшекті терможелі пистолетімен жапсырдым. Белдемше көлемді болуы үшін үш сақиналы астыңғы белдемше пайдаландық. Негізгі белдемшені қап матадан тіктік. Ұзындығы бір метрден болатын бес бөлік матам болды. Оларды бір-біріне жалғап, қажетті көлем шығуы үшін бел тұсын қатпарлап тіктік», – деп бөлісті Толғанай.

Бұдан кейін жұмыстың ең ұқыптылықты қажет ететін кезеңі басталды. Толғанай белдемшеге қамыстың әр бұтағын бір-бірлеп жапсыра бастаған. Көп ұзамай табиғи материалдың бүкіл көйлекке жетпейтіні белгілі болды. Сондықтан ол шешімін өзгертіп, белдемшенің бір бөлігін үлпілдек қамыспен, екінші бөлігін жасанды жапырақтар мен бүрлермен безендірді.

«Меніңше, образды ерекше еткен де осы үйлесім. Ал үстіңгі бөлігі – иықбауы бар кәдімгі топ. Қызғылт сары фатиннен жең жасадым», – деді блогер.

Видео жарияланғаннан кейін Толғанай жұмысының шынайылығына күмән келтірген қолданушыларға арнайы жауап берді. Ол пікірінде өзі және отбасы туралы да айтып өтті.

«Видеомның астына осындай пікір жазамын деп ешқашан ойламаппын. Мен үш баланың анасымын. Кішкентайым екі айлық. Видеода байқауға қатысқан үлкен қызым тұр. Бұл образды екеуміз өз қолымызбен жасадық. Барлығы қолдан жасалған», – деп жазды Толғанай.

Бала күтіміндегі ана жазбасында осындай киімге қажетті табиғи материалдарды қайдан табуға болатынын да бөліскен. Мәселен, образдың басты бөлшегіне айналған үлпілдек қамыс Әулие Архангел Михаил шіркеуінің маңында өседі.