Бала жансақтау бөлімшесінде 16 күн жатты, деп хабарлайды @Pavlodarnews.kz 

Облыстық денсаулық сақтау басқармасының мәліметінше, маусымның басында үш жастағы  қыз бала жалпақ батареяны жұтып, 2-3 дәрежелі  өңештің химиялық күйігін алған. Сәби Павлодар облыстық балалар ауруханасының жансақтау бөліміне жеткізілген. 

– Тыныс алуының жеткіліксіздігінен баланың жағдайы ауыр болды.  Пневмомедиастинум, өңештің химиялық күйігі, интоксикация диагнозы қойылды, – дейді басқармада. – Батарея эндоскопиялық жолмен алынды.

Шілденің басында қыз бала стационарлық ем алғаннан кейін ауруханадан шығарылды. Жағдайы қанағаттанарлық деп бағаланды.

– Статистика бойынша кішкентай балалар көбінесе тиындар, ойыншықтардың ұсақ бөлшектерін, түймелер, сырғалар, сақиналар, қағаз қыстырғыштар, инелер, түйреуіштер, тіс тазалағыштарды жұтып қояды, – дейді басқармада. – Сондай-ақ, шағын батарея, магниттер және гидрогель шарларын жұтқан оқиғалар жиі кездеседі.

Айта кетейік, жалпы соңғы бес айда  28 бала облыстық балалар ауруханасына «бөгде зат» диагнозымен түскен.

Фото: ашық дереккөздерден алынған