Гавай аралдарындағы өрттен қаза тапқандар саны 67 адамға жетті, бұл штат тарихындағы құрбандар саны көп болған табиғи апат, деп хабарлайды ҚазАқпарат BBC News-ке сілтеме жасап.

Басқа жүздеген адам жоғалғандар тізімінде, сондықтан құрбандар саны тағы өсуі мүмкін.

Коменданттық сағат Лахайнада күн сайын жергілікті уақыт бойынша 22.00-ден 06.00-ге дейін жұмыс істейді, ал қаланың ең көп зардап шеккен бөлігі іздеу-құтқару қызметтері үшін әлі де шектеулі.

Естеріңізге сала кетейік, бұған дейін АҚШ сенаторы әлеуметтік желіде Лахайна «толығымен дерлік өртеніп кеткенін» айтқан болатын.

Лахайна орналасқан батыс Мауи әлі күнге дейін электр қуаты мен сусыз отыр.

«Лахайна қираған аймаққа айналды. Олар (тұрғындар) өз өмірлерінде бұрын-соңды мұндайды көрмеген», - деді апаттан кейін қалаға келген губернатор Джош Грин. - Өте сақ болыңыздар, абай болыңыздар».

Ол Мауи аралындағы өрттен болған зиянды өтеу үшін ұзақ жылдар қажет болатынын айтты, көптеген адамдар баспанасыз қалды. Жыл сайын екі миллионға жуық туристерді тартатын бай тарихы бар жағалаудағы Лахайна қаласында 1000-нан астам ғимарат қирады.

Жұма күні Мауи округінің шенеуніктері Лахайнада тағы 12 адамның мерт болғанын растады.

Мауидегі өрттер Гавайдағы ең қауіпті табиғи апат болды, ол тіпті 1960 жылы 61 адамның өмірін қиған цунамиді басып озды.

Аралда көптеген бай адамдар тұрады, соның ішінде Amazon негізін қалаушы Джефф Безос. Ол сүйіктісі Лорен Санчес екеуі өрттен зардап шеккендерге көмектесу үшін 100 миллион доллар бөлуге уәде берді.

Гавайдың Мауи аралында және Үлкен аралда бұрын-соңды болмаған өрт сейсенбі күні кешке басталды.