Павлодар қаласының шетіндегі ауылда сегіз көшеге асфальт төселеді

Қала әкімі Жетекші ауылының тұрғындарымен абаттандыру жоспарларымен бөлісті, деп хабарлайды @Pavlodarnews.kz тілшісі.

Тұрғындармен кездесуде Ержан Иманзайыпов ауылдың әлеуметтік-экономикалық дамуының негізгі тұстарын атап өтті.

2022 жылы жеке тұрғын үй құрылысы ауданында су құбыры желілерін тарту жұмыстары басталды. Жұмыстарды ағымдағы жылдың шілде айында аяқтау жоспарланған.

- Ауыл тұрғындарын абаттандыру мәселесі ерекше қызықтырады. 2023 жылы Жетекшідегі сегіз көшеге асфальт төсеуді жоспарлап отырмыз. Теміржолшылар шағынауданының тұрғындарынан бірнеше өтініш түсті. Олар Жетекші екеуінің арасына жаяу жүргіншілер белгісін, сондай-ақ жаңа мектеп жанындағы жолға жасанды төмпешік орнатуды сұрап отыр. Орынбасарыма осы мәселелерді қарауды тапсырдым, - деді әкім Instagram парақшасында.

Сонымен қатар, тұрғындардың қауіпсіздігі үшін Теміржолшылар ауылында бейнебақылау камералары орнатылады. ТҮКШ бөлімінің мамандарына камераларды орнататын орындарды анықтау үшін тұрғындармен кездесу тапсырылды, деп қосты Ержан Иманзайыпов.