Өңір басшысы Асайын Байханов облыс орталығындағы нөсерлік кәріз жүйесінің құрылыс жұмыстарын тексерді, деп хабарлайды @Pavlodarnews.kz тілшісі.

Жаңа жоба көп жылдан бері шешілмей келе жатқан су басу мәселесін шешуге және қаладағы ең жүктемелі учаскелердің біріндегі жол жамылғысының сапасын сақтауға мүмкіндік береді. Ондаған жылдар бойы Қамзин көшесінде тұрғындары жер асты суларының тым жақын орналасуына байланысты асфальт бұзылуда. Әр жауған жаңбырдан кейін аулалар мен жол айрықтарында тұтас «көлдер» жиналып, жүргізушілер мен жаяу жүргіншілерге қолайсыздық тудыратын.

Павлодар облысының әкімі Асайын Байхановтың тапсырмасы бойынша биыл дренаж жүйесінің құрылысы бірден үш учаскеде басталды: Қамзин, Чайковский – Осипенко және Шөкин – Павлов. Соның ішінде екеуінде жұмыстар толық аяқталды, ал Қамзин көшесінде 1,5 шақырымнан шамамен 150 метр құбырды салу ғана қалды.

Мердігерлердің айтуынша, бұл нысанда диаметрі 530 мм болатын арнайы дренаж құбырлары қолданылуда. Олар геотекстильмен қапталған және су қабылдауға арналған тесіктермен жабдықталған. Жиналған суды жақын маңдағы көлге және орталық қалалық коллекторға бағыттау көзделген. Дренаж желілерінің жалпы ұзындығы шамамен екі шақырым болады.

– Біз ең алдымен «Batyr mall» қасындағы көлден бастадық, себебі жиналған жер асты суларын бірден сол жерге бұру қажет болды. Сонымен қатар орталық коллекторға да қосылдық, бұл еріген қар суларын да тиімді басқаруға мүмкіндік береді, – деді мердігер өкілі.

Облыс әкімі Павлодарда толыққанды нөсерлік кәріз жүйесінің іс жүзінде жоқ екенін атап өтті. Өткен жылы 20 мың тұрғынды жылумен қамтамасыз ететін жылу магистралінің құрылысы кезінде жағдай айтарлықтай қиын болған. Жер асты суларының жоғары деңгейіне байланысты құрылысшылар суды үнемі сорып отыруға мәжбүр болған, әйтпесе жаңа құбырлар коррозияға ұшырауы мүмкін еді.

– Біз бүкіл қала үшін нөсерлік кәріз жүйесін салу бойынша ауқымды жобаның қажеттігі туралы шешім қабылдадық. Алайда бұл үшін шамамен жүз миллиард теңге көлемінде қомақты инвестициялар қажет және қала тұрғындары үшін белгілі бір уақытша қолайсыздықтар тудырады. Өйткені бірнеше көшені бір мезгілде қазуға тура келеді, – деді Асайын Байханов.

Қазіргі таңда Қамзин көшесінің 5,1 шақырымына дренаж жүйесі толықтай орнатылған. Қалған учаскедегі жұмыстар аяқталғаннан кейін мердігерлер жол жамылғысын қалпына келтіруге, жиектастарды ауыстыруға және тротуарлар салуға кіріседі.

Құрылыс жұмыстары осы айдың соңына дейін аяқталады деп жоспарланып отыр.