Өңірде есірткі құқық бұзушылықтарының алдын алу жөніндегі кеңес құрылды, деп хабарлайды @Pavlodarnews.kz тілшісі.

Оған қоғам қайраткерлері, жастар ұйымдарының өкілдері, блогерлер, журналистер, сондай-ақ құқық қорғау және денсаулық сақтау саласындағы сарапшылар кірді.

– Кеңестің негізгі мақсаты – есірткінің заңсыз айналымына қарсы күресте қоғам мен мемлекеттің күш-жігерін біріктіру, сондай-ақ олардың таралуының алдын алу бойынша тиімді шаралар әзірлеу, – деді облыстық полиция департаментінде. – Жұртшылық өкілдерімен бірлескен жұмыс ашық диалогқа, пікір алмасуға және есірткі қаупіне қарсы іс-қимылдың заманауи тетіктерін әзірлеуге негізделген профилактиканың тиімді жүйесін құруға мүмкіндік береді. 

Полиция департаменті кеңес мүшелерімен бірлесіп тыйым салынған заттарды, оның ішінде интернет-кеңістікте жарнамалау және тарату жағдайларын жедел анықтап, жолын кесетін болады. Тыйым салынған контентті анықтау және оны жою үшін тиісті органдармен жедел өзара іс-қимыл жасау тұрғысынан желінің мониторингіне ерекше назар аударылады.

Тәртіп сақшылары өңірдің әрбір тұрғынын шетте қалмауға, есірткінің заңсыз таралу фактілері туралы хабарлауға және профилактикалық іс-шараларға белсенді қатысуға шақырады.