ҚПЛ кезекті туры Көкшетауда басталады, деп хабарлайды @Pavlodarnews.kz тілшісі. 

Қазақстан футбол чемпионатында еурокубок аймағына жолдама алу және Премьер-лигадағы орнын сақтап қалу жолындағы күрес жалғасады. Алдағы турда павлодарлық «Ертіс» Алматыда «Қайратпен» кездессе, «Жетісу» мен «Қайсар» арасындағы ойын турнирлік жағдайға тікелей әсер етуі мүмкін.

Тур Көкшетауда басталады. Сағат 15:00-де еурокубок аймағына ілігуді көздейтін «Оқжетпес» петропавлдық «Қызылжарды» қабылдайды. Көкшетаулықтар өз алаңында жеңіске жетіп, жоғары орындар үшін күресті жалғастыруға ниетті. Ал қонақтар элитадағы орнын сақтап қалу міндетін біртіндеп шешіп келеді. Дегенмен, «Қызылжардың» әлеуеті бұдан да жоғары орындарға таласуға мүмкіндік беретіндей.

Талдықорғанда өтетін «Жетісу» мен «Қайсар» арасындағы матч та ерекше назар аудартады. Екі команда да турнирлік кестенің төменгі бөлігінде қалып, Премьер-лигада қалу үшін күресуге мәжбүр. Сондықтан бұл кездесу алты ұпайға таласқандай маңызды болмақ: жеңімпаз бағалы ұпайларға қол жеткізіп қана қоймай, тікелей бәсекелесінің жағдайын қиындата алады.

«Жетісу» турнирлік қиындықтарға қарамастан, мықты қарсыластарға лайықты қарсылық көрсете алатынын дәлелдеді. Өткен турда талдықорғандықтар алматылық «Қайратқа» қарсы жақсы ойын көрсетіп, бір ғана голдың айырмасымен жеңілді. Енді команда сол ойындағы жағымды әсерді нәтижеге айналдыруға тырысады.

Сенбідегі орталық кездесу Ақтөбеде өтеді. Сағат 19:00-де «Ақтөбе» мен «Ордабасы» күш сынасады. Алаң иелері еурокубок аймағына жақындауды көздесе, шымкенттік клуб чемпиондық атақ үшін күресіп жатыр. Екі команданың да мақсаты айқын болғандықтан, тартысты әрі ымырасыз ойын күтуге болады.

Жексенбіде «Алтай» мен «Атырау» кездеседі. Екі команда да элитадағы орнын сақтап қалу үшін ұпай жинауға мұқтаж. Өскемендік клуб мазмұнды футбол көрсетіп жүр және өз алаңындағы мүмкіндікті пайдалануға тырысады. «Атырау» үшін де бұл матч маусым соңындағы жағдайын жақсартуға мүмкіндік береді.

Павлодар жанкүйерлері үшін турдың басты оқиғасы — «Ертістің» Алматыға сапары. Жексенбі күні сағат 18:00-де павлодарлықтар Конференция лигасының негізгі кезеңінде алғаш рет ойнаған «Қайратпен» кездеседі. Алматылық клубтың ойын әлеуеті жоғары, сондықтан «Ертісті» күрделі сынақ күтіп тұр.

Маусымның шешуші кезеңінде павлодарлықтар үшін әрбір ұпайдың маңызы зор. Премьер-лигада қалу жолындағы бәсекеде қарсыластардың нәтижелерін де ескеруге тура келеді. Дегенмен, елдің жетекші клубтарының бірімен өтетін кездесу «Ертіске» өз мүмкіндігін көрсетуге және күтпеген нәтиже тіркеуге жақсы мүмкіндік береді.

Алдағы турда бір командалар еурокубок жолдамасы мен чемпиондық атақ үшін күресті жалғастырса, екіншілері элитада қалуға тырысады. Маусым мәресіне жақындаған сайын әрбір қателіктің құны арта түсуде.