Прокурорлар алимент төлеуді бақылауды күшейтуде, деп хабарлайды @Pavlodarnews.kz тілшісі.

Прокуратура органдары сот шешімдерінің орындалуын жүйелі түрде қамтамасыз етуде, ең алдымен балалардың құқықтарын қорғауға қатысты алимент өндіру істеріне басымдық берілуде.

Борышкерлерге нақты жауапкершілік шаралары қолданылады: елден шығуға шектеу қою, әкімшілік және қылмыстық жауапкершілікке тарту, цифрлық іздестіру. Бұл жұмыс қазірдің өзінде оң нәтижесін беруде.

– Тек қаңтар айының өзінде Қылмыстық кодекстің 139-бабы бойынша алимент төлеуден жалтарған үш азамат сотталды. Олардың бірі үш жыл бойы төлем жасаудан жалтарып, табысын жасырып, үш кәмелетке толмаған баласын асырауға бермеген берешегі 2,2 миллион теңге болған, – деді прокуратурада. 

Тағы бір жағдайда төрт миллион теңгеден астам берешек бола тұра, борышкер жұмысқа орналасу мүмкіндігі болғанына қарамастан алты жылдан астам уақыт бойы алимент төлемеген.

Қазіргі уақытта сотқа дейінгі тергеп-тексеру органдарының өндірісінде тағы жеті қылмыстық іс бар.