Күзет агенттіктерін таңдауға ерекше назар аударылатын болады, деп хабарлайды @Pavlodarnews.kz.

Қалалық білім беру бөлімінің басшысы Қуаныш Қыдыралин күзет кәсіпорындарының өкілдерімен жиналыс өткізді. Кездесуге Павлодар облысы бойынша Ұлттық қауіпсіздік комитеті департаментінің, Ішкі істер департаментінің, полиция басқармасының қызметкерлері де қатысты. Құзыретті мамандар төтенше жағдайлардағы алгоритмдер мен іс-қимылдарды түсіндірді.

– Білім беру объектілеріндегі қауіпсіздік - басым мәселелердің бірі. Сондықтан балаларды қорғауда өз ісінің ең білікті мамандары болуы керек,– деді қалалық білім беру бөлімінің басшысы.

Кеңес барысында төтенше жағдайлардың алдын алу және болдырмау бойынша жұмыс істейтін жұмыс тобын құру туралы шешім қабылданды. Бұл жұмыс жаз бойы өтеді. Мониторинг қорытындысы бойынша күзет кәсіпорындарына қатысты тиісті шаралар қабылданатын болады.

– Бүгінгі таңда білім беру мекемелерінде 10 күзет кәсіпорны жұмыс істейді. Объектілердегі қауіпсіздікті 62 күзетші қамтамасыз етеді. Зейнеткерлік жастағы және зейнеткерлікке дейінгі жастағы күзетшілермен проблема бар, оны жаз бойы шешетін боламыз,– деп атап өтті Қуаныш Қыдыралин.

Қауіпсіздікке қатысты нормативтік құжаттарды өзгерту жөніндегі ұсыныстар бейінді министрліктерге жолданатын болады.