Инновациялық Еуразия университетіне Пәкістаннан екі ғылым докторы келді, деп хабарлайды @Pavlodarnews.kz.

Университеттің баспасөз қызметінің мәлімдеуінше, ИнЕУ білім беру сапасына көп көңіл бөледі. Сондықтан ЖОО-да өңірдің белгілі ғалымдары ғана емес, әлем ғалымдары да дәріс оқиды. Мәселен, университетке Пәкістаннан арнайы шақыртумен келген экономика ғылымдарының докторлары Заид Ашик Хан және Узаир Алиді атап өтуге болады. 

Шетелдік ұстаздар өз өмірлерін ауыл шаруашылығы мен қоршаған ортаны дамытуға және осы саланың экономикасын зерттеуге арнаған.

- Университетке келген меймандар жай мамандар емес. Олардың әрқайсысының жиырмадан астам ғылыми еңбектері бар. Ғалымдар  академиялық қоғамдастыққа елеулі үлес қосқан әрі осы салаға қатысты мәселелерді түсінуге жаңа перспективалар енгізген жандар, - делінген хабарламада. 

Доктор Заид Ашик Хан ауыл шаруашылығы экономикасына маманданған, онда оның зерттеулері тұрақты егіншіліктен бастап, ауыл шаруашылық нарықтарын талдауға дейінгі тақырыптардың кең ауқымын қамтиды. Оның ғылыми жарияланымдары ауыл шаруашылығы туралы білімді кеңейтіп қана қоймай, сонымен қатар агроөнеркәсіптік кешеннің тиімділігін арттыру үшін маңызды.

Ал доктор Узаир Али өзінің мансабын қоршаған орта экономикасын зерттеуге арнады. Оның зерттеулері тұрақты даму, климаттың өзгеруі және адам қызметінің табиғи ресурстарға әсері мәселелерін қамтиды. 

Екі ғалым да әсерлі академиялық тәжірибеге ие болып қана қоймай, ғылыми пікірталастар мен білім алмасуға белсенді қатысуда.