Павлодарлық жас музыканттар Ресейде жеңіске жетті

Музыкалық колледж студенттері баян, домра және басқа аспаптарда ойнады, деп хабарлайды @Pavlodarnews.kz тілшісі.
Музыкалық кешеннің оқушылары Ресейдің Қазан қаласында өткен II халық аспаптарында орындаушылардың «Folk Art» халықаралық конкурсында жеңімпаз атанды.
– Конкурс бүкіл әлемнен дарынды музыканттарды жинап, халық аспаптарында өнер көрсету мүмкіндігін ұсынады, – деді колледж әкімшілігі.
Бұл жетістік – студенттердің көпжылдық еңбегі мен тынымсыз жаттығуларының нәтижесі және колледж қабырғасында алған сапалы білімдерінің жемісі. Жастар тәжірибелі оқытушылардың басшылығымен тек ойын техникасын меңгеріп қана қоймай, халық музыкасының орындау ерекшеліктерін де үйренуде. Бұл олардың ұлттық музыкалық дәстүріне деген сүйіспеншіліктерін нығайтады.
ҚР Мәдениет үздігі, оқытушы О.Петрушкинаның шәкірті Наил Батталов бірінші дәрежелі лауреат атағын қанжығасына байлады. Мектеп-интернат оқушылары Ниязбек Нұримран және Жаңабай Арслан II дәрежелі лауреат атағын алды.