Халықаралық балаларды қорғау күні қарсаңында Павлодар облыстық перинаталдық орталығында жас аналар мен жаңа туған нәрестелерге арналған қайырымдылық акциясы өтті, деп хабарлайды @Pavlodarnews.kz тілшісі.

Мереке қарсаңында және Балаларды қорғау күні дүниеге келген сәбилердің аналарына қоғам белсендісі әрі кәсіпкер Татьяна Кайль ізгі тілегін жеткізді.

- Баланың дүниеге келуі – әр отбасы үшін үлкен қуаныш. Барлық нәрестелерге зор денсаулық, бақытты балалық шақ және жарқын болашақ тілеймін. Олар еліміздің саналы әрі лайықты азаматтары болып өссін. Ал әр отбасының шаңырағында амандық, береке мен махаббат орнасын, – деді Татьяна Кайль.

Сондай-ақ ол жас аналарға тезірек сауығып, отбасы бақыты мен тыныштығын тіледі.

Акция аясында отбасыларға жаңа туған сәбилерге қажетті заттар салынған сыйлық жиынтықтары табысталды.

Перинаталдық орталық өкілдерінің айтуынша, мұндай бастамалар жас отбасыларды қолдауға және маңызды сәттерде көтеріңкі көңіл-күй сыйлауға бағытталған.

Медициналық мекеме әкімшілігі Татьяна Кайльге отбасыларға көрсеткен қолдауы мен әлеуметтік бастамаларға қосқан үлесі үшін алғыс білдірді.