Көшіп келгендердің көбі бизнеспен айналысып жатыр, деп хабарлайды @Pavlodarnews.kz тілшісі.

Өткен жылы Ертіс ауданына Қазақстанның Оңтүстігінен 26 отбасы қоныстанған. Оның ішінде бір отбасы Өзбекстаннан болса, қалғандары Моңғолиядан келген.

«Мансап» орталығының қоныстандыру жөніндегі маманы Жанаргүл Жұмағұлованың айтуынша, жаңадан келгендердің арасында кандастар көп. Олар аудан орталығынан гөрі Қарақұдық ауылында тұрғанды жөн көреді. 90-шы жылдары қоныс аударуды бастаған олар осы күнге дейін басқаларды туған елге оралуға шақырады.

Жақында Ертіс ауданы 86 келушімен толықты. Қазір «Мансап» орталығы тағы қырық адамды қабылдауға дайындалып жатыр.

Барлық жаңа қоныстанушылар мемлекеттен адам басына 258 440 теңге алады. Егер олардың бизнес-жоспарлары болса, 1,48 миллион теңге көлемінде тегін грант ала алады.

– Көбі еліміздің оңтүстігінен келгенде бизнес жасай бастайды. Үш отбасы сүт өнімдерін өндіру бойынша грантқа ие болды. Қаражатты бергеннен кейін  бұл ақшаның дұрыс бағытта кетіп жатқанын бақылау үшін мониторинг жүргізіледі. Ай сайын өздері есеп тапсырады, – деді Жанаргүл Жұмағұлова.

Сонымен қатар, олардың тегін баспана алуға құқығы бар. 2020 жылы «Еңбек» бағдарламасы бойынша қоныс аударғандар үшін үйлер салынды. Бірақ бұл үйлерді сатып алу мүмкін емес.

– Тек қайталама тұрғын үй сатып алуға болады. Сатып алу құнының жартысын төлейміз. Біз ұсына алатын ең жоғары сома 1 160 АЕК – 4 282 720 теңге, – деді маман.

Қоныстанушылар мемлекет қаржысын алып, қайтадан бұрын тұрған жерге оралатын жағдайлар бар. Алты айдан кейін ақшаны қайтармаса, «Мансап» орталығы тәртіп бұзушыларды сотқа бере алады.

«Халықтың көші-қоны туралы» заңға сәйкес, қоныс аударғандар өңірде бес жыл тұруы керек.