Жаңа ресурстар мен инвестициялық мүмкіндіктер анықталды, деп хабарлайды @Pavlodarnews.kz.

Қазақстан 2019–2024 жылдарға арналған жер қойнауын геологиялық зерттеудің мемлекеттік бағдарламасы аясындағы негізгі кезеңді аяқтады. ҚР Өнеркәсіп және құрылыс министрлігі Геология комитетінің мәліметінше, алты жыл ішінде 2,014 миллион шаршы шақырым аумақта жұмыстар жүргізіліп, жоспардың 91,6 пайызы орындалды.

– Бағдарламаның басты мақсаты – 2026 жылға дейін ел аумағын геологиялық тұрғыдан толық қамту, минералдық-шикізат кешенінің ғылыми негізін қалыптастыру және инвестициялық тартымдылығын арттыру болатын, – делінген хабарламада.

Жұмыстар төрт негізгі бағыт бойынша 112 учаскеде жүргізілді: геологиялық барлау, минералогиялық карта жасау, терең карталау және гидрогеологиялық зерттеулер. Нәтижесінде, стратегиялық ресурстары бар 38 перспективалы бағыт анықталды. Сирек жер металдарының болжамды қоры 2,6 миллион тоннаны құрайды. Мыс пен никельдің жиынтық көлемі 3,7 миллион тоннаға жеткен. Қоңыр көмірдің ресурсы шамамен 1,1 миллиард тонна болса, алтын қоры 19 тонна деп бағаланды.

Сонымен қатар, Арал шөгінді бассейнінде жүргізілген жұмыстар 266 млн тонна көмірсутек қорының болуын растады. Барлау кезеңінде 306 лицензия беріліп, салаға 137 миллиард теңгеден астам жеке инвестиция тартылды.

Кадрлық әлеует те артып келеді. 2022–2024 жылдар аралығында геология мамандығы бойынша бітірушілер саны 2,5 есеге өсті. Сонымен қатар, алғаш рет геология саласындағы ерекше еңбек үшін «Еңбек сіңірген геолог» мемлекеттік марапаты тағайындалды.

Қазақстан геологиялық барлау жұмыстарының сапасы мен жер қойнауын пайдаланудың ашықтығы бойынша Орталық Азияда көшбасшы болуға бет алды. Қалған 200 мың шаршы метрді қамтитын бағдарлама 2025-2026 жылдары жалғасады. Назар оңтүстік және батыс аймақтарға, оның ішінде Сырдария бассейніне және сирек металдар бойынша перспективалы аймақтарға аударылады.