Ұсыныс мобильді аударымдар мен цифрлық теңгені де қамтуы мүмкін, деп хабарлайды @Pavlodarnews.kz тілшісі.

ҚР Ұлттық экономика министрлігі баспасөз орталығының мәліметінше, Салық кодексін енгізу жөніндегі жобалық кеңестің 26-отырысында заманауи қолма-қол ақшасыз төлемдерді дамыту мәселелері талқыланды. Отырыс Премьер-министрдің орынбасары – ұлттық экономика министрі Серік Жұманғариннің төрағалығымен өтті.

Қазір төлем карточкаларымен жасалатын операцияларға қызмет көрсету ҚҚС-тан босатылған. Қаржы реттеушілері бұл жеңілдікті QR-төлемдер, телефон нөмірі бойынша аударымдар, электрондық ақша және цифрлық теңге сияқты өзге де қолма-қол ақшасыз төлемдерге қызмет көрсетуге таратуды ұсынып отыр.

Ведомствоның мәліметінше, қолданыстағы жеңілдік кезінде төлем карточкалары ең кең таралған есеп айырысу құралдарының бірі болған. Кейін QR-төлемдер, мобильді аударымдар және цифрлық теңге сияқты жаңа тәсілдер пайда болып, төлем нарығы айтарлықтай өзгерді.

Алайда салықтық жеңілдіктерді жаңа құралдарға қолдану үшін оның экономикалық тиімділігін бағалап, жеңілдік қолданылатын операциялардың нақты тізімін анықтау қажет.

– QR-төлемдер мен цифрлық теңгені қоса алғанда, заманауи төлем құралдарын дамыту – оң бағыт. Бұл ретте ұсынылған шараның экономикалық әсерін негіздеу қажет, – деді Серік Жұманғарин.

Талқылау қорытындысында Қаржы министрлігіне Қаржы нарығын реттеу және дамыту агенттігі және Ұлттық банкпен бірлесіп ұсынысты қосымша пысықтау, заңнамалық нормаларды нақтылау және тиісті есептерді ұсыну тапсырылды.

Отырыста пайдалы қазбаларды өндіру салығының нөлдік мөлшерлемесін қолдануға қатысты заңға тәуелді актілерді жаңарту мәселесі де қаралды. Өнеркәсіп және құрылыс министрлігіне рентабельділігі төмен қатты пайдалы қазбалар кен орындарының өлшемдерін және олардың рентабельділігін айқындау қағидаларын нақтылау тапсырылды.