Павлодарлық Сәрсен Жетібаев Сауд Арабиясының Эр-Рияд қаласында өткен жекпе-жек ойындарында үздік атанды, деп хабарлайды @Pavlodarnews.kz тілшісі.

Облыс әкімі баспасөз қызметінің мәліметінше, аймақ басшысы Асайын Байханов грэпплингтен Дүниежүзілік жекпе-жек ойындарының чемпионы Сәрсен Жетібаевты құттықтады.

2023 жылғы 21-24 қазанда Сауд Арабиясының Эр-Рияд қаласында 16 спорт түрінен Дүниежүзілік жекпе-жек ойындары өтті. Оған 80 елден 3000-нан астам спортшы қатысты. Қазақстанның атынан спорттың тоғыз түрінен 53 спортшы қатысты.

71 келіде павлодарлық Сәрсен Жетібаев үздік атанды. Ол – үш жекпе-жек өткізіп, грэпплингтен Дүниежүзілік жекпе-жек ойындарында чемпион атанған тұңғыш қазақстандық. 1/4 финалда жерлесіміз Венгриялық спортшымен кездесіп, 1/2-де украиналықтан басым түсті, ал, финалда өзбек спортшысын қапы қалдырды.

Аймақ басшысы спортшыға қол жеткізген нәтижемен тоқтап қалмай, алдағы халықаралық жарыстарда табысты өнер көрсетуді тілеп, 500 мың теңгеге ақшалай сертификат табыс етті. Сондай-ақ, чемпионды дайындаған жаттықтырушы – Заирбек Абылкадыровқа 300 мың теңгеге сертификат табысталды.