Аймақ басшысы Асайын Байханов Екінші Павлодар шағын ауданындағы бұрынғы теміржол колледжінің ғимаратын қайта жаңарту бойынша көшпелі жиналыс өткізді, деп хабарлайды @Pavlodarnews.kz.

Облыс әкімі баспасөз қызметінің мәліметінше, бес жыл ішінде барлық коммуникациялардан ажыратылған ғимарат қаңырап бос тұрған, әрі тоналып, қираған. Шағын аудан тұрғындары қараусыз қалған колледжде белгілі бір тұрғылықты жері жоқ адамдар жиналғандықтан, мұндай қауіпті көршілерден қорқатындары туралы бірнеше рет шағымданған. 

Осыдан соң Екінші Павлодар тұрғындарының өтініштері мен ұсыныстарын қарағаннан кейін балалар мен жастардың дамуы үшін өнер орталығын ашу идеясы туындады. 

3500 шаршы метр аумақта 6 жастан 18 жасқа дейінгі балалар мен жастар өз қызығушылықтары бойынша үйірме таба алатын кеңістік құру жоспарлануда. Мұнда хореография және спорт залдары, қыш ыдыстар жасау және өнер шеберханалары, Workshop, дыбыс жазу студиясы, фотостудия, телестудия және т. б. үйірмелер ашылады. 

Қазір шағын ауданның балалары мен жасөспірімдеріне қосымша білім алу үшін М. Катаев атындағы Оқушылар сарайына немесе қаланың басқа шағын аудандарындағы аула клубтары мен орталықтарына баруға тура келеді. 

Үй-жайларды күрделі жөндеу, шатырды және барлық инженерлік инфрақұрылымды ауыстыру көзделген реконструкция жұмыстарын 2023 жылдың көктемінде бастау жоспарланып отыр. Жұмыстарды аяқтау мерзімі - 2024 жылдың ақпан айы. 

Асайын Байханов Екінші Павлодардың балалары мен жастары үшін осындай орталықтың жақын жердегі қолжетімділікте ашылуының маңыздылығын атап өтіп, орталық өзінің алғашқы оқушыларын жаңа жылда қабылдауы үшін жұмыс қарқынын жеделдетуді тапсырды. Әкім жұмыстарды жедел жүргізуді, бірақ сапасына нұқсан келтірмеу керектігін ерекше атап өтті. Сондай-ақ, іргелес аумақты абаттандыру, футбол, баскетбол, скейтбординг, воркаут және т.б. жаттығулар үшін балалар мен спорт алаңдарын жабдықтау жоспарланып отыр.