Әйелдер қанатының бірінші отырысында өндірістегі және ғылыми ортадағы әйелдерге қатысты өзекті мәселелер талқыланды, деп хабарлайды  @Pavlodarnews.kz тілшісі.

«AMANAT» партиясы Павлодар облыстық филиалы баспасөз қызметінің мәліметінше, еңбек басқармасы еңбек қауіпсіздігі және еңбекті қорғау бақылау бөлімінің басшысы Абылай Сабыров өндірістегі әйелдердің еңбегіне қатысты ағымдағы ахуал туралы баяндады. 

–   Облыс ұйымдарында жұмыс істейтін әйелдер саны жұмыс істейтін адамдардың жалпы санының 50%-ын құрайды. Азаматтардың өтініштері бойынша жүргізілген тексерулер барысында әйелдердің еңбегін қорғау бойынша бұзушылықтар анықталған жоқ, – дейді Абылай Сабыров. 

Оның айтуынша, еңбек инспекциясы өндірістік жарақаттануға талдау жүргізеді. Мәселен, өткен жылмен салыстырғанда жарақат алу көрсеткіші 1%-ға төмендеді. 2023 жылы облыстың кәсіпорындары мен ұйымдарында барлығы 106 жазатайым оқиға тіркелді: 111 адам зардап шекті, оның 22%-ы – әйелдер.

 Кеңес мүшелері ведомствомен байланыс тәсілдері туралы хабардарлықтың төмен деңгейіне және өнеркәсіптік кәсіпорындар қызметкерлеріне назар аударды. Стендтер мен ақпараттық тақталарға жедел желі нөмірлерін орналастыру, сондай-ақ әлеуметтік желілер мен мессенджерлер арқылы халықты ақпараттандыру бойынша жұмысты күшейту жөнінде ұсыныстар берілді. 

– Дәл қазір мен іздеу жүйесіне жүгіну жолдары туралы ақпаратты енгізуге тырыстым, бірақ сіздің нөмірлеріңізді де, сайтты да, әлеуметтік желілердегі парақшаларға сілтемелерді де көрмедім. Іс жүзінде әрбір кәсіпорында қауіпсіздік техникасы және еңбекті қорғау жөніндегі бөлімдер бар екеніне қарамастан, сіздің ведомствоңызға тікелей хабарласудың жолдары болуы тиіс, – деп атап өтті кеңес мүшесі, депутат Елена Яровенко.

 Сондай-ақ, әйелдер кеңесінің жұмысы барысында ғылымдағы әйелдерді іске асыру мүмкіндіктерін насихаттау және қамтамасыз ету мәселелері талқыланды. Өңірдің оқу орындарының басшылары мен өкілдері бірқатар ұсыныстар жасады, соның ішінде: ЖОО-лар жанынан балалар бөлмелерін ашу, ерекше қажеттіліктері бар балаларға арналған инклюзивті мектептер құру және т. б. 

– Әрине, әйелдердің ғылыми салада болуының жоғары пайызына қарамастан, оларға жұмыс істеу қиынырақ, өйткені кәсіби қызметтен басқа, отбасылық өмір мен бала тәрбиесі үшін жауапкершілік жүктемесі олардың мойнына түседі, – деп атап өтті әйелдердің құқықтары мен мүмкіндіктерін кеңейту мәселелері жөніндегі кеңесші Света Абдраманова.

Ол өз сөзінде барлық ұсыныстарды республикалық деңгейде қарастырып, егжей-тегжейлі талқылаудан кейін заңнамаға өзгерістер мен толықтырулар енгізу туралы мәселені көтеру қажет екенін атап өтті.