Жыл сайын жазатайым оқиғалардың пайызы төмендеп келеді, деп хабарлайды @Pavlodarnews.kz.

Павлодарда "Каустик" АҚ базасында Еңбек күніне орай "Қауіпсіз еңбек: профилактикадан нөлдік жарақатқа дейін" өңірлік форумы өтті. Оған кәсіпорын басшылары, салалық және жергілікті бастауыш кәсіподақ ұйымдары филиалдарының төрағалары, еңбек қауіпсіздігі және еңбекті қорғау қызметтерінің басшылары, еңбекті қорғау жөніндегі техникалық инспекторлар қатысты.

Қазақстан Республикасы Кәсіподақтар федерациясы төрағасының бірінші орынбасары Мұхтар Тінікеев өз ведомствосының Парламентке жіберетін ұсыныстары туралы баяндады.
Олардың басым бөлігі еңбек қауіпсіздігі жөніндегі кейбір заңнамалық актілерге өзгерістер мен толықтырулар енгізуге қатысты болды.

- Павлодар облысының 23 кәсіпорнында нөлдік жарақат алу тұжырымдамасы енгізілді. Бірақ әлі де еңбек қауіпсіздігі ережелері қалдық қағидат бойынша сақталуда, - деп атап өтті спикер.

Облыстық еңбек басқармасының басшысы Асқар Қапанов өңірдегі еңбек қауіпсіздігі және еңбекті қорғау бойынша мемлекеттік бақылау тақырыбында сөз сөйледі.

- Сегіз айда 62 жазатайым оқиға орын алып, екеуі қаза тапты. Өткен жылмен салыстырғанда жарақат бес пайызға төмендеді. Сонымен қатар, біз жыл сайын төмендеуді байқаймыз. Биыл өңір тұрғындарынан 800-ден астам өтініш келіп түсті. Шағымдардың көпшілігі жалақыға қатысты болды. Адамдар еңбекті қорғау ережелерінің бұзылуына өте сирек шағымданады, - деп түйіндеді Асқар Қапанов.

Ол Қазақстанда жарақаттанудың алдын алудың бірыңғай республикалық бағдарламасы қажет екенін айтты. Қазақстандық электролиз зауытының еңбекті қорғау және өнеркәсіптік қауіпсіздік бөлімінің бастығы Асхат Құсайынов өз кәсіпорнында ұйымдастырылған жарақаттанудың алдын алу жұмыстары туралы айтып берді.

- Жұмыс кәсіподақтармен бірлесіп жүргізілуде. Егер қызметкер қандай да бір өндірістік процесс кезінде денсаулығына зиян тигізуі немесе өміріне қауіп төндіруі мүмкін деп санаса, олар жұмысты тоқтата тұруға және оны орындамауға құқылы, -  деді ол.

Оның айтуынша, тағы бір тиімді шара – анықталған бұзушылықтар бойынша статистикалық сараптама жүргізу.

Биылғы жылы 21 тексеру барысында 1136 бұзушылықты анықталды.