Қазақстанда 1992 жылы Алматыда өткен рухани келісімнің алғашқы әлемдік конгресінен бері 18 қазан Рухани келісім күні ретінде атап өтілуде, деп хабарлайды @Pavlodarnews.kz.

Мемлекет басшысы Қасым-Жомарт Тоқаевтың айтуынша, «Береке мен бірлік, тұрақтылық пен тыныштық, татулық пен келісім – біздің басты байлығымыз». Бұл күн Павлодар облысында да маңызды оқиға болып саналады.

Облысымызда діни бірлестіктердің өкілдері арасында рухани келісім мен тұрақтылықты сақтау мақсатында жұмыстар жүргізілуде. Павлодар облыстық дін істері басқармасының жанындағы келісім клубы өңірдегі барлық діндердің өкілдерін біріктіреді. Клуб мүшелері тоқсанына бір рет кездесіп, діни тұрақтылық, рухани келісім, тілдік түсіністік сынды тақырыптарды талқылайды. Сонымен қатар, нашақорлық, лудомания және суицидке қарсы күрес мәселелері де көтеріліп, қоғамға пайдалы ұсыныстар жасалады.

Облыстық дін істері басқармасының бөлім басшысы Әділет Мейірман клубтың 2015 жылдан бері жұмыс істеп келе жатқанын атап өтті.

–  Елімізде 18 діни конфессия болса, Павлодар облысында 13 конфессия тіркелген. Олардың жетекшілері осы клубтың мүшесі болып саналады, – дейді ол. Клубтың басты мақсаты – діни тұрақтылықты сақтау және рухани келісімді нығайту.

Жақында облыстағы барлық дін өкілдері арасында зияткерлік ойын ұйымдастырылды. Ойынға сегіз команда қатысып, дін мен мәдениет тарихы туралы сұрақтарға жауап берді. Нәтижесінде Жетінші күн Адвентистері жеңіске жетті. Әділет Асқарұлы, клуб мүшелерінің бірі, осындай шаралардың діни бірлестіктер арасындағы ауызбіршілікті арттыруға септігін тигізетінін айтты.

– Бұл кездесулерде әрбір діннің ұстанымы әртүрлі болғанымен, мемлекет мүддесі үшін ортақ пікірлер айтылады, – деп атап өтті ол.

Павлодар облысындағы діни сенімдердің көптүрлілігіне қарамастан, барлық дін өкілдерінің Қазақстанның тыныштығы мен татулығы жолындағы көзқарастары бір жерде түйіседі.