Кеншілер қаласында не істелгені туралы облыс әкімі есеп беру кездесуінде айтты, деп хабарлайды @Pavlodarnews.kz тілшісі. Өтіп бара жатқан жылды қорытындылай отырып, әкім инфрақұрылымды дамытудағы негізгі нәтижелерге тоқталды.

1. Үйлерде тұрақты жылу.

Асайын Байхановтың мәлімдеуінше, жөндеу, қайта құру және инженерлік-коммуникациялық инфрақұрылымды жаңғырту жұмыстарының кешенді шаралары жылу жүйелерінің тозуын 92 пайыздан 75 пайызға дейін төмендетті.

Екібастұз ЖЭО-ның қазандықтары мен желілік жабдықтарын жаңғыртуға 20 миллиард теңгеден астам инвестиция салынды. Бұл жылу көзінің тозуын айтарлықтай азайтты.

Жылу беру маусымын қала әкімі ғана емес, облыс басшысы да бақылауда ұстады. Биыл батареялар 16 қыркүйектен бастап жылынған, ал 29 қыркүйекке дейін көпқабатты үйлер толық жылумен қамтамасыз етілді.

2. Қазіргі заманғы жарықтандыру.

Қалада көше мен аулаларды жарықтандыру жүйесін жаңғырту қолға алынды. Бұрын бұл аймақтарда жарық жоқ еді. Қазір 279 ауланың 116-сы жарықтандырылды. Келесі жылы тағы жүзге жуық аула жарықтандырылады.

3. Жолдарды асфальттау.

Соңғы жиырма жылда алғаш рет 50 аула мен 24 әлеуметтік нысан, соның ішінде мектептердің аумағы асфальтпен жабылды. Бірқатар жеке сектор көшелерінде топырақ жолды асфальт алмастырады.

4. Тұрғындардың демалыс аймағы.

Екібастұздықтардың өтініші бойынша билік «Шахтер» саябағын қайта жаңғырту жұмыстарын бастады. Жоба келесі жылы аяқталады. 27 гектар аймақ концерт алаңы, фудкорт, мұз айдыны/роллердром, скейт-парк, Workout және баскетбол алаңдары, балалар ойын аймақтары, жағажайы бар көл сияқты функционалды аймақтарға бөлінеді.

5. Балаларға арналған инфрақұрылым.

Облыс әкімі бұл қала жайлылығының бір көрсеткіші екенін айтты. Қалада 66 заманауи балалар алаңы, 20 мини-футбол алаңы, 10 хоккей корты, алты воркаут және бес стритбол алаңы орнатылды.

6. Президент тапсырмасының орындалуы.

Өткен жылдың тамыз айында ел Президенті «Самғау» балалар шығармашылығы орталығын салуды тапсырған болатын. Бұл орталық биыл жылдың соңында ашылды. «Самғауға» 12 бағыт бойынша тоғыз мың бала қатыса алады.

7. Бассейн.

№17 мектеп жанындағы балалар жүзу бассейнінің ғимараты тұрғындардың сұрауы бойынша күрделі жөндеуден өтті. Ғимарат үш жылдан астам бос тұрған еді. Бассейн ерекше қажеттіліктері бар балалардың оқуына және демалысына бейімделді.

8. Қоғамдық көлік реформасы.

Электронды билеттеу жүйесін енгізу және субсидиялау саясатын өзгерту үлкен класты жаңа автобустармен паркті толығымен жаңартуға мүмкіндік берді. Бұл қозғалыс жиілігін және тасымалдау сапасын едәуір жақсартты.

«Golden Dragon» автобустары заманауи жабдықтармен жабдықталған. Қозғалыс аралығын 12-15 минуттан 8-10 минутқа дейін, ал кейбір бағыттарда 30 минуттан 15-20 минутқа дейін қысқартты.

9. Теміржол вокзалы.

Жөндеу жұмыстары 40 жылдан бері күтілген еді. Реконструкциядан кейін ғимарат жылы әрі жайлы болады. Вокзалда балалар ойын аймағы, демалыс бөлмесі, хостел, намазхана, медициналық кабинет, ана мен бала бөлмесі бар. Вокзал 2025 жылдың қаңтарында жұмысын бастайды.

10. Ірі инвестициялық жобалар.

Биылғы жетістіктер қатарына облыс әкімі сегіз жобаны іске асыруды қосты. Бұл жобаларға үш мыңға жуық екібастұздық тартылды.

11. Мектептерді кешенді жаңғырту.

10 мектепте – №11, 2, 21, 23, 10, 12, 17, 31, Бәйет және Атығай мектептерінде күрделі жөндеу жұмыстары жүргізілді. Келесі жылы тағы бес білім беру мекемесінде – №9, 13, 16, 17, 14 мектептерінде өзгерістер күтілуде.

12. Ерекше қажеттіліктері бар балаларға арналған балабақшаны жаңғырту.

31-ықшамаудандағы қараусыз қалған балабақша ғимараты сатып алынды.