Барлық жүзеге асырылып жатқан жобалар әкімнің жеке бақылауында, деп хабарлайды @Pavlodarnews.kz тілшісі.

Аян Бейсекин өзінің «Instagram» парақшасында атап өткендей, қазіргі таңда 50 балалар ойын алаңын, 20 футбол алаңын, алты көше воркауты мен бес стритбол алаңын, сондай-ақ 10 хоккей кортын жайластыру жұмыстары аяқталуға жақын. 

– Жұмыстың басым бөлігі аяқталды. 20 футбол алаңының 15-і аяқталды, тағы бесеуі аяқталу сатысында. Жұмыстарды екі аптаның ішінде аяқтау міндетін қойдым. Жалпы, орындалған жұмыстардың сапасына ризамын, – деп жазды ол әлеуметтік желіде футбол алаңдары жайлы.

Хоккей корттарына келетін болсақ, қазіргі уақытта іргетас дайындау жұмыстары жүргізілуде. Қала басшысы мердігерге адам санын көбейтіп, жұмыс қарқынын арттыруды тапсырды.

– Тамыз айындағы бюджетті нақтылау кезінде қала бюджетінен қаражат бөлінді. Конкурстық рәсімдерді ескере отырып, келісімшарт қыркүйек айының басында жасалған болатын. Хоккей корттары жазда роллердром қызметін атқарады. Бұл аумақтар адамдардың, әсіресе, жастардың назарын аударатын орын болатынын көріп отырмыз. Сондықтан біз фондық музыкаға арналған жабдықты орнатуды, коньки, роликтерді жалға беруді ұйымдастыруды және тағы басқаларын жоспарлап отырмыз, – деді Аян Бейсекин.

Сонымен қатар, қала әкімі балалар ойын алаңдары орнатылып жатқан бірнеше мекенжайларды аралап өтті. 

– Ескертулер бар, сондықтан мен мердігерге барлық кемшіліктерді тез арада түзетуді тапсырдым. Ескертулердің жойылуын тексеру үшін қайта ораламын. Мердігермен жасалған келісім-шарт қазан айын қоса алғанда жарамды. Барлық жоспарланған жұмыстар өз уақытында және толық көлемде орындалады. ТҮКШ бөлімі мен өзімнің орынбасарыма жүргізіліп жатқан абаттандыру жобаларының сапасын жүйелі түрде қадағалауды тапсырдым, – деп қосты ол.

Аян Бейсекин облыс әкімінің қолдауымен келесі жылы да қаланы абаттандыруды жоғары қарқынмен жалғастыруға сенім білдірді.

Посмотреть эту публикацию в Instagram

Публикация от Аян Бейсекин (@abeysekin)