Үндістандық инвестор электр қуаты тарифінің қымбаттылығына шағымданды, деп хабарлайды @Pavlodarnews.kz тілшісі.

Облыстық Кәсіпкерлер палатасы баспасөз қызметінің мәліметінше, Ерқанат Әбеновке «ANSA Silico» жауапкершілігінің бас директоры Рамеш Чандра Панда Екібастұздағы кремний зауытын салудың инвестициялық жобасын жүзеге асыруға көмек көрсету мәселелерін талқылау бойынша жеке кездесу барысында айтты.

Инвестордың айтуынша, кәсіпорынды іске қосу жұмыстары қызу жүріп жатыр: олардың зауытын іске қосу үшін қажетті электр қосалқы станциясы тестілеуден өтті.

– Сізге және бұған ықпал еткен мемлекеттік органдарға қолдау көрсеткеніңіз үшін рахмет. Ток тізбектерін жүктеу ғана қалды. Бұл біздің қосалқы станцияны пайдалануға берудің соңғы қадамы болады. Біз ГРЭС-1 және ферроқорытпа зауыты тарапынан су құбырын салуға рұқсат алдық. Бәрін алдағы бірнеше айда аяқтауға тырысамыз, – деді Палата басшысына Рамеш Чандра Панда.

Зауытқа келетін болсақ, қазір компания бас мердігерлік туралы негізгі шартқа қол қою сатысында.

Барлық техникалық мәселелер келісілді, деп сендірді кәсіпкер. Қызмет көрсетуші қытай компаниясы болады.

– Бірақ біз зауыттың тиімсіз болуына қауіп төндіретін проблемаға тап болдық, бұл – электр қуатының жоғары құны. Алдында біз «Kazakh Invest» ұлттық компаниясы» АҚ-мен кездесіп, олар бізге осы мәселені шешуде көмек көрсету үшін тез арада келісімшартқа қол қоюды сұрады, – деп жағдайды сипаттады кәсіпорынның бас директоры.

Компания Қазақстанның даму банкімен жұмыс істеуді жоспарлап отырғанын айтты.

Барлығына қолайлы бас келісімшартқа қол қойылмаса, банк қаржыландырудан бас тартуы мүмкін, өйткені ол да жоғары тарифтерді ескере отырып, жоба тиімсіз болады деп есептейді. Өз тарапынан инвестор «KAZAKH INVEST» ҰК» АҚ-нан келісімге келу үшін тиімді тарифтер бойынша келісуге көмектесуін сұрады.

– Бізге екі-үш ай қажет. Тариф құны туралы жазбаша келісім алсақ, ары қарай жүреміз, – деді үнді тарапының өкілі.

Ол Қазақстанның даму банкі мен инвестордың өзі электр энергиясына ұсынылған бағамен «ANSA Silicon» ЖШС зауыт салуға мүмкіндігі бар екенін және бұл жоба тиімді болатынын көруі үшін тарифті келістіру мәселесінде Кәсіпкерлер палатасынан көмек сұрады.

– Бүгінге дейін 14 миллиард теңге инвестиция құйып үлгердік. Қосалқы станцияның іске қосылуы аяқталғанша, бәлкім, тағы бір миллиард теңге шығын қосылатын шығар. Яғни, инвестор өз тарапынан ұлттық экономиканың құрылысына инвестиция салу бойынша өз міндеттемелерін орындайды, – деп баса айтты спикер.

Бұған дейін компания электр жабдықтарын импорттау кезінде қосылған құн салығын төлеуден босатылған болатын. 2022 жылдың наурыз айында бұл құқық одан алынды. 

Компания өкілінің айтуынша, артықшылық қайтарылмаса, жағдай жобаның табыстылығына әсер етуі мүмкін. Ерқанат Әбенов Палата алаңында облыс прокуратурасымен бірлесіп жұмыс істейтін инвестициялық жобалар бойынша фронт-офистің жұмысы туралы айтты. Ол сипатталған мәселені фронт-офис отырысына шығаруды ұсынды.

– Біз барлық кәсіпкерлердің құқықтарын қорғаймыз. Электрмен жабдықтаумен, электр энергиясын жеткізумен айналысатын ұйымдар да, сататын ұйымдар да – бизнес субъектілері болып табылады. Біз де олардың құқықтарын қорғауға тиіспіз. Бірақ фронт-офис жұмысы және қолайлы инвестициялық ахуалды қолдау аясында бұл жағдайды қарастыруға болады, – деп уәде берді Палата директоры.

Тағы бір нұсқа – облыстық кәсіпкерлер палатасы «Kazakh Invest» АҚ-мен бірлесіп жүргізетін инвестициялық жобалардың интерактивті картасына не болып жатқаны туралы ақпаратты енгізу. Онда инвесторлардың өздерінің деректері негізінде жобаны жүзеге асырудың барлық кезеңдері туралы ақпарат енгізіледі. Бұл ақпаратты республикалық инвестициялық штабтың басшысы, Премьер-министрдің орынбасары, Ұлттық кәсіпкерлер палатасы президиумының төрағасы да пайдаланады.