Атты патруль көлік жүре алмайтын аймақтар үшін қолайлы. Бірінші  кезекте жазғы коттедждер қамтылады, деп хабарлайды  Рavlodarnews.kz.

Облыстық полиция департаменті баспасөз қызметінің мәліметінше, жазғы кезеңде авто және жаяу патрульдерден басқа, патрульдік полиция батальонының  жылқы взводы да қызмет атқарады. Тәртіп сақшылары өздеріне сеніп тапсырылған аумақтың барлық периметрі бойынша жағдайды, соның ішінде көліктер өтпейтін жерлерді назарда ұстауы тиіс. 

– Полиция қызметкерлері бау-бақша шаруашылығында үнемі рейдтер жүргізеді: бау-бақша аумағында заңсыз жүрген, белгілі бір тұрғылықты жері жоқ адамдарды анықтау және ұрлықтың алдын алу мақсатында тексеріс жүргізіледі. Құрылыс объектілері, оның ішінде құрылысы тоқтатылған және қараусыз қалған ғимараттар, саяжай учаскелері тексеріледі, – деді Павлодар облысы полиция департаменті бастығының бірінші орынбасары Жасқайрат Қайыров.

Сондай-ақ облыстық полиция департаменті мен төтенше жағдайлар департаментінің қызметкерлері Ертіс өзені мен бау-бақша алқабындағы өрттердің жиілеп кетуіне байланысты бірлескен рейдтік іс-шаралар өткізу туралы шешім қабылдаған. 

– Әдетте саяжай кезеңінің басталуымен халық құрғақ шөпті өртеп, от жағып, қалдықтар мен қоқыстарды жинап, өртей бастайды. Бұл – өрттің шығуының себептерінің бірі. Мұның бәріне тыйым салынады. Бүгінгі таңда учаскелік полиция инспекторлары бау-бақша шаруашылықтарының төрағаларымен бірлесіп, аумақтарды аралап, қараусыз қалған учаскелер мен үйсіз қалған адамдарды анықтауда, – дейді Жасқайрат Қайыров.

Полиция өрт қою фактілері үшін жауапкершілік бар екені туралы еске салды. ҚР ӘҚБтК-нің 336-бабына сәйкес – «қалдықтарды жинау немесе жағу кезінде атмосфералық ауаны қорғау және өрт қауіпсіздігі жөніндегі талаптарды сақтамағаны үшін  20-дан 500 АЕК-ке дейін, ҚР ӘҚБтК-нің 367-бабы - ормандардағы өрт қауіпсіздігі мен санитарлық ережелердің талаптарын бұзу 10-нан 150 АЕК-ке дейін айыппұл салуға әкеп соғады.

Әкімшілік жауапкершіліктен басқа, Қазақстан Республикасы ҚК-нің 202-бабында көзделген – «бөтеннің мүлкін қасақана жою немесе бүлдіру» және Қазақстан Республикасы ҚК-нің 341-бабында «ормандарды жою немесе бүлдіру» фактілері үшін қылмыстық жауапкершілікке тарту қарастырылған.