Қонақтар тәжірибесінің арқасында жеңіске жетті, деп хабарлайды @Pavlodarnews.kz тілшісі.

«1Xbet Pro Hokei Ligasy» баспасөз қызметінің мәліметінше, турнир кестесінің соңында тұрған «Ертіс» өз алаңында «Горняк» командасынан екі кездесуде де жеңіліс тапты. Алайда, екінші ойында павлодарлықтар лайықты қарсылық көрсете білді, бұл олардың турнирлік жағдайын ескерсек, маңызды жетістік болды.

Бірінші ойын: 1:8 есебімен тас-талқан

Алғашқы матч «Ертіс» үшін өте сәтсіз басталды. Бірінші минутта-ақ олар өз қақпасына екі шайба жіберіп алды: Лазарев есеп ашса, Юлбарисов айырманы еселеді. Содан кейін рудныйлықтар бірінші кезеңнің соңына дейін басымдықты сақтап, Гурин, Кротов және Крициннің голдары арқылы есепті 0:5-ке дейін жеткізді. Ойын барысында «Горняк» ойыншылары жеке бомбардирлік көрсеткіштерін едәуір толықтырды. Евгений Степанов қонақтардың бес нәтижелі шабуылына қатысты, ал Валерий Гурин мен Оскар Юлбарисов бір шайбадан соғып, үш нәтижелі пас берді.

Екінші және үшінші кезеңдерде «Горняк» командасы Платонов, Степанов және Утебаевтың шайбаларынан кейін есепті 0:8-ге дейін жеткізді. «Ертіс» тек ойынның соңында ғана Акпиргановтың голы арқылы айырманы қысқарта алды. Матч 1:8 есебімен «Горняк» пайдасына аяқталды. Қақпашылар арасында «Ертіс» сапында Какенов ойынды бастағанымен, көп ұзамай оның орнына Нечвиенко шықты, ал «Горняк» қақпасын Тихонов қорғады.

Екінші ойын: тартысты жеңіліс (4:5)

Ірі жеңілістен кейін «Ертіс» екінші ойында қарсыластарына нағыз күрес ұсына алды. Алғашқы кезеңде есеп ашылмағанымен екінші кезең Гурин мен Кротовтың нәтижелі соққыларынан бастау алды. Алайда алаң иелері тез жауап қайтарып, Пидяшов пен Букарь есепті теңестірді – 2:2.

Соңғы кезең де өте тартысты өтті. Саввин рудныйлықтарды қайта алға шығарса, Пидяшов аз уақыттан кейін есепті қайта теңестірді – 3:3. Тіпті Демирделен гол соғып, «Ертісті» 4:3 есебімен алға шығарды. Алайда, тәжірибелі рудныйлықтар таразы басын өз жағына аударды. Юлбарисов азшылықта ойнай отырып есепті теңестірсе, Валерий Гурин екінші шайбасын соғып, жеңіс голының авторы атанды. Осылайша, «Горняк» 4:5 есебімен жеңіске жетті. Бұл ойында Евгений Степанов та үш нәтижелі пас беріп, командасына үлкен үлес қосты.

Қақпашылар: «Ертіс» – Нечвиенко, «Горняк» – Тихонов.

«Ертіс» келесі ойындарын өз айдынында турнирлік кестеде 6-орында тұрған «Алматы» командасына қарсы өткізеді. Матчтар 1 желтоқсан мен 2 желтоқсан күндері өтеді.