Оларға банкет дастарханын жайып, тағамдарды дайындауға бірнеше сағат берілді, деп хабарлайды @Pavlodarnews.kz тілшісі.

Білімі ерекше студенттер арасында «Abilimpics» кәсіптік чемпионаты өтті. Азық-түлік жартылай фабрикаттарын өндірушілерге арналған аймақтағы жалғыз бағдарламаның 20 студенті екі бағытта – мейрамхана қызметі және аспаздық өнер бойынша сайысқа түсті.

Инклюзивті білім беру бағдарламасы әрекет ететін технологиялық колледжде  олар ерекше қажеттіліктері бар жұмысшылар үшін болашақ мамандықтардың бейімделуін ескере отырып, біліктілік тестін ұйымдастыруды ұйғарғандарын атап өтті.

– Біз студенттеріміздің зауыттарда ауыр физикалық еңбекпен айналысуына жол бере алмаймыз. Бұл мамандықтар қауіпсіз емес. Сондықтан біз олардың өзін кәсіби тұрғыдан жүзеге асыруына мүмкіндік беретін бағытты таңдадық, – деді  колледж басшысының оқу ісі жөніндегі орынбасары Шолпан Бектұрғанова.

Мейрамхана қызметі номинациясында қатысушылар банкет беріп, алкогольсіз коктейльдер дайындады. «Пісіру» кезеңінде «Трайфл» десерті мен сүт коктейль жасау керек болды. Тапсырмаларды орындауға еріктілер мен мұғалімдер көмектесті. Олар тапсырмалар қатысушылардың ерекшеліктеріне бейімделгенін, олардың көмегімен оқушылардың ұсақ моторикасы дамитынын, топта жұмыс істеуге үйренетінін, кәсіби дағдыларды меңгеретінін алға тартты.

– Банкетке  арналған дастархан жайып, өз рецептімізбен лимонад дайындадық. Мен чемпионатқа қатысып, өзімді жақсы жағынан көрсетуге тырыстып, –дейді жартылай фабрикат операторы мамандығының бірінші курс студенті Айбек Жүсіпов.

Барлық қатысушыларға қатысу сертификаттары берілді. Аспаздық бойынша Николай Золотых пен мейрамхана қызметі бойынша Юлия Яницкая жеңімпаз атанды.

Биылғы жылы тәлімгер ретінде «Тең мүмкіндіктер әлемі» қоғамдық қорының былтырғы чемпионатқа қатысушылары шақырылды. Ұйым өкілі Галина Алексеенконың айтуынша, аймақта «Abilimpics» чемпионаттардан бөлек, басқа да инклюзивті бағдарламаларға қолдау көрсетіледі.

– «Тең мүмкіндіктер әлемі» қоғамдық қоры «Саламатты болашақ» әлеуметтік жобасын жүзеге асыруда. Мүмкіндігі шектеулі балалар мен жасөспірімдерге арналған тегін спорт секцияларының желісін құрудамыз. Үш жылдан бері «Abilimpics» қолдап келеміз. Біз инклюзияның дамып келе жатқанына және жасөспірімдердің кәсіби білім алу мүмкіндігіне ие болғанына қуаныштымыз, деді Галина Алексеенко.

Павлодар облысында жобаға 136 адам тартылған. Балалар жүзу, адаптивті футбол, инклюзивті хореография және басқа да спорт түрлерінен жарыстарға қатысады.