Елімізде 1 шілдеден бастап орманшылардың жалақысы екі есе өседі, деп хабарлайды BAQ.KZ тілшісі.

Мұндай мәліметті ЭТРМ Орман шаруашылығы және жануарлар дүниесі комитеті төрағасының орынбасары Данияр Тұрғамбаев айтты.

- Бүгінгі күні ұлттық парктер мен қорықтарда 2 525 адам жұмыс істейді. Осы күнге дейін орман шаруашылығы саласындағы ең төменгі жалақының бірі болатын. Бірақ қазіргі уақытта осы мәселе бойынша министрлікпен бірге тиісті жұмыс жүргізілді. Енді 1 шілдеден бастап жалақы 100 пайызға өсіреді деп көздеп отырмыз, - деді Данияр Тұрғамбаев Казгидрометте өткен брифингте.

Сөзінше, орман шаруашылығы саласындағы мамандардың ең төменгі жалақысы штаттық кесте бойынша 80 000 теңгеден астам. Бұл - инспекторлардың жалақысы. Енді осы жалақы екі есе өседі.

- 2 525 адамның 1 912-сі инспектор болып жұмыс істейді. Бұл нормаға сай емес. Саны екі есе көп болуы керек. Десе де мамандардың саны көбейіп келеді, - деп айтты ол.

Сөзінше, мамандарды осы салаға қызықтырудың бір жолы - жалақыны көтеру.