Қалада жүргізілген гидравликалық сынақтар кезінде 143 ақау анықталды, деп хабарлайды @Pavlodarnews.kz тілшісі.

Екібастұз жылу желілерінің баспасөз қызметінің хабарлауынша, 25 ақау магистральдық желілерде, ал 118-і аулаішілік желілерде тіркелген.

– Ақауларды жоюмен 17 бригада айналысып жатыр. Олардың құрамында штаттық қызметкерлермен қатар мердігер ұйымдар да бар. Ыстық суды қайта беру тек ақаулар кезең-кезеңімен жойылғаннан кейін ғана мүмкін болады,  – деді мекеме өкілдері. 

Мекеме өкілдері ыстық судың уақытша тоқтатылу кестесін жариялады.

21 шілдеден 10 тамызға дейін ЖМ №1, 2, 3, 4, 5, 6, 7, 8, 9, 10, 11, 12, 13, 16 учаскелерінде ыстық су өшіріледі. Бұл желілерге 620 көпқабатты тұрғын үй мен 76 әлеуметтік нысан қосылған. Сондай-ақ осы мерзімде жетінші жылу магистралі бойынша да тоқтау болады, ол 17 тұрғын үй мен үш әлеуметтік нысанды қамтиды.

21 шілдеден 15 тамызға дейін ЖМ-14 және 15 учаскелерінде жөндеу жұмыстары жүргізіледі. Бұл желілер арқылы 30 тұрғын үй ыстық сумен қамтамасыз етіледі.

Ақаулар жойылған сайын, ыстық су кезең-кезеңімен қайта қосылады. Екібастұз тұрғындарына жылу желісі мекемесінің ресми хабарламаларын бақылап отыру ұсынылады.