Ауданның жас бишілеріне арнап жаңа костюмдер тігілді, деп хабарлайды @Pavlodarnews.kz тілшісі.

Павлодар ауданында 72 түрлі шығармашылық ұжым жұмыс істейді. Солардың ішіндегі ең көп қатысушысы бар ұжымдардың бірі – Чернояр ауылдық округіндегі «Үміт» би ансамблі. Аптасына екі рет Черноярка және Сычевка ауылдарының қыздары жергілікті мәдениет үйіне жиналады. Кіші топтарда бір сабақ 50 минуттан аспайды, өйткені балаларға тез шаршайды. Ал ересектеу қыздардың сабағы бір жарым сағатқа дейін созылады. Оларға техникалық және физикалық дайындық, күрделі қимылдарды пысықтау қажет, сондықтан жаттығулар да ұзағырақ өтеді.

Бес жыл бұрын құрылған және жұмысын төрт қатысушымен бастаған «Үміт» ансамблінде бүгінде 5 пен 18 жас аралығындағы 45 тәрбиеленуші бар. Мектеп пен ауылдық іс-шаралардағы алғашқы концерттерден кейін үйірмеге жазылғысы келетіндер көбейіп, бірнеше айдан соң оларды жас ерекшеліктеріне қарай бірнеше топқа бөлу қажеттілігі туындаған. Кіші топтардағы 12 қыз шығармашылық жолын енді бастап жүр. Бірінші топта 8-ден 10 жасқа дейінгі, екінші топта 5-тен 7 жасқа дейінгі бишілер дайындалады. 14 пен 18 жас аралығындағы тағы тоғыз қатысушы ересектер тобына барады. Ең белсенді топ – 10-нан 13 жасқа дейінгі 12 қыздан құралған ортаңғы топ. 

Ансамбльдің көркемдік жетекшісі әрі хореографы Оксана Витковскаяның айтуынша, би бағытын таңдағанда балалардың жасы мен мүмкіндіктері ескеріледі. Ересектер тобы негізінен халықтық хореографиямен айналысады, оларға көбіне халық билерінің стильдендірілген нұсқалары қойылады. Ортаңғы және кіші топтарда заманауи және эстрадалық хореографияға басымдық беріледі.

Жекелеген би қойылымдарын әзірлеу үшін «Үміт» ансамблі кейде басқа педагог-хореографтарды шақырады.

– Бұл балалар үшін де, маман ретінде мен үшін де маңызды, – деп түсіндіреді хореограф. – Бір педагог бірнеше топпен қатар жұмыс істегенде, оның әрқайсысына үнемі мүлде бөлек қойылымдар жасауына физикалық тұрғыдан да, шығармашылық жағынан да оңай емес. Уақыт өте келе бір авторлық мәнер байқалып, билер бір-біріне ұқсай бастауы мүмкін.

Шақырылған педагог биді қойып қана қоймай, балаларға жаңа материал, стиль және өзінің хореографиялық қолтаңбасын ұсына алады. Бұл – тәжірибе алмасудың да мүмкіндігі. Ал балалар үшін жаңа маманмен жұмыс істеп, басқа мәнерде өздерін сынап көру әрдайым қызықты. Қозғалыстарды талдау, биді тазалау, қимылдардың үйлесімділігі, техника, ұсақ-түйек бөлшектер, әртістік шеберлік және қойылымды қажетті деңгейге жеткізу сияқты кейінгі жұмыстардың барлығын Оксана Витковская атқарады.

– Егер қойылымды толығымен өзім жасасам, онда барлық жұмысты өзім атқарамын: музыканы таңдаймын, идеяны, бидің бейнесі мен сипатын ойластырамын және хореографиясын қоямын, – деп түсіндірді сұхбаттасушы. – Бұл ретте ең алдымен балалардың жасын, мүмкіндіктерін және дайындық деңгейін ескеремін.

Шақырылған хореографқа көбіне белгілі бір идея ұсынылады: қойылымнан нақты нені көргісі келетіні, қандай бейне мен бағыт қызықтыратыны түсіндіріледі. Ал педагог сол ойды жүзеге асыруға көмектеседі.

– Ортаңғы және ересектер топтарға арналған үлкен бірлескен қойылым дайындап жатырмыз. Сахнаға 21 биші шығады, – деп жоспарымен бөлісті Оксана Витковская. – Қазақтың этностильдегі биін әзірлеудеміз. Павлодардағы «Мастерская танца» ұжымынан Галина Мальчиковскаяға жүгіндім. Оған қандай қойылымды елестететінімді, қандай бейнелер жасағым келетінін айттым. Жұмыс барысында ол музыка ұсынып, хореографиясын өзі қойды.

Қойылым ауқымды болғандықтан, хореографияны ғана емес, костюмдерді, екі топтың бірлескен жаттығуларын және басқа да көптеген жайттарды ойластыру маңызды. Бұл биді Наурызға дейін дайындау жоспарланған. Алайда оны қажетті деңгейге жеткізу үшін ансамбль қазірдің өзінде қимылдардың егжей-тегжейін және олардың үйлесімділігін пысықтап жатыр.

– Маған осындай тәсіл ұнайды, өйткені нәтижесінде менің идеям мен көзқарасым басқа хореографтың тәжірибесімен және өзіндік мәнерімен ұштасады. Мұндай тәсіл көрермендердің ықыласына бөленіп қана қоймай, шығармашылық байқауларда жүлделі орындарға ие болуға да көмектеседі, – деді Оксана Витковская.

Биыл ұжым Павлодар қаласында өткен екі ірі республикалық байқауда бірінші орын алды. Олар – көпжанрлы «Таланттар достастығы» және хореографиялық «Импульс» байқаулары. Педагогтың пікірінше, байқаулар балаларға үлкен мотивация береді.

– Бала өз еңбегінің нәтижесін көріп, марапат алса немесе көрермендерден қолдау сөздерін естісе, одан әрі алға қанаттанып, дамығысы келеді, – деді көркемдік жетекші. – Сонымен қатар, қыздарға биге деген сүйіспеншілік, сахна, достары және жақсырақ болуға деген ұмтылыс шабыт береді.

Хореографтың айтуынша, «Үміт» олар үшін енді жай ғана би сабағы емес, нағыз командаға айналған. Мұнда қыздар бірге жаттығады, өнер көрсетеді, нәтижеге алаңдайды және ортақ жеңістерге қуанады. Ұжымда бір-біріне үлкен қолдау көрсетеді.

Ұжымның жетістіктерін көрген Павлодар ауданының әкімдігі жаңа костюмдер тігуге қаражат бөлген. Әдетте костюмдердің басым бөлігін, әсіресе, эстрадалық және тақырыптық қойылымдарға арналған киімдерді ата-аналар көбіне өз қаражатына сатып алады немесе тіктіреді. Негізі сахналық киім нақты бір қойылымға арналып жасалады және оны басқа биде пайдалану әрдайым мүмкін бола бермейді.

– Ұлттық костюмдерге қатысты жағдай күрделірек, – деп қосты сұхбаттасушы. – Мен жұмысқа келген кезде мәдениет үйінде балаларымыз өнер көрсетіп жүрген ескі костюмдер бар еді. Олардың жасы биші қыздармен шамалас болатын.

2023 жылы Павлодар ауданының 95 жылдығына орай ересектер тобына жаңа ұлттық костюмдер тігілген. Алайда олар да қыздарға тар бола бастаған.

– Биыл аудан әкіміне ұжымның костюмдерін жаңартуға көмектесуін сұрап өтініш білдірдім. Бұл әсіресе, ортаңғы топқа қажет болды, – деді Оксана Витковская. – Бұған аймақтық және аудандық деңгейде ұйымдастырылып жүрген дәстүрлі «Өнер додасы» байқауында Павлодар ауданының атынан өнер көрсететін ересектер тобының алдағы қойылымы да себеп болды.

Ортаңғы және ересек топтарына жаңа қазақтың ұлттық костюмдерін алынды. Олар осы киімдермен Республика күніне арналған іс-шараларға қатысады.

«Үміт» ансамблі байқауларға қатысудың алдын ала жоспарын жасап қойған. Оның ішінде қараша айында өтетін көпжанрлы «Жұлдыздар ұрпағы» байқауына қатысу да бар. Келесі жылдың жоспарына Art Mix көпжанрлы байқауы және ортаңғы мен ересектер топтары үш қойылым дайындап жатқан «GULNAR FEST» халықаралық көпжанрлы байқауы енгізілген.

Кіші топтағы қыздар әзірге байқауларға қатыспайды, өйткені олар шығармашылық жолын енді бастады. Оксана Витковская үшін олардың қалай дамитынын, сахнаға және байқауларға қатысудың жүктемесіне қаншалықты дайын болатынын бақылау маңыздырақ.