Бес айдың қорытындысы бойынша өңірде өнеркәсіп, құрылыс, сауда және ауыл шаруашылығы салаларында тұрақты өсім байқалады, деп хабарлайды @Pavlodarnews.kz тілшісі.
Өңір басшысы Асайын Байханов өңірдің 2026 жылдың алғашқы бес айындағы әлеуметтік-экономикалық даму қорытындыларына арналған жиын өткізді. Кеңесте облыстық бюджеттің орындалуы, екінші тоқсанның болжамды көрсеткіштері және өзекті мәселелер қаралды.
Қаңтар-мамыр айларының қорытындысы бойынша Павлодар облысы негізгі макроэкономикалық көрсеткіштердің басым бөлігінде оң динамика көрсетті.
Ең жоғары нәтиже инвестиция тарту саласында тіркелді. Негізгі капиталға салынған инвестициялар көлемінің нақты өсім индексі 141,3 пайызды құрап, өңір республика бойынша бірінші орынға шықты. Бес ай ішінде облыс экономикасына 343 млрд теңге инвестиция тартылған.
– Қысқа мерзімді экономикалық индикатор 105,6 пайызды құрады. Бұл республикалық орташа көрсеткіштен 3,1 пайызға жоғары, – деп атап өтілді жиында.

Өнеркәсіп өнімінің көлемі 1,8 трлн теңгеге жетті. Өсім негізінен өңдеу өнеркәсібі, электр энергиясы және сумен жабдықтау салалары есебінен қамтамасыз етілген.
Ауыл шаруашылығының жалпы өнім көлемі 81,8 млрд теңгені құрап, өткен жылдың сәйкес кезеңімен салыстырғанда 4,3 пайызға артқан. Құрылыс жұмыстарының көлемі 20 пайызға өсіп, 105 мың шаршы метрден астам тұрғын үй пайдалануға берілді. Ішкі сауда көлемі 26 пайызға, көлік қызметтері көлемі 6,7 пайызға ұлғайған.
Алдын ала болжам бойынша бірінші жартыжылдық қорытындысында да оң үрдіс сақталады. Инвестициялар көлемі 464 млрд теңгеге жетеді деп күтілуде. Құрылыс саласындағы өсім 10,4 пайызды, ауыл шаруашылығындағы өсім 5,7 пайызды құрауы мүмкін.
Жиында облыстық бюджеттің орындалуы да қаралды. 1 маусымдағы жағдай бойынша бюджет кірістері 213 млрд теңгеге жетіп, өткен жылдың сәйкес кезеңімен салыстырғанда 32,9 млрд теңгеге артқан. Бюджет шығыстары 98,8 пайызға орындалып, 243,1 млрд теңгені құрады.
Сонымен қатар кеңесте білім беру және тұрғын үй-коммуналдық шаруашылық нысандарын алдағы жылыту маусымына дайындау, жылу желілерін жаңғырту және жол жөндеу жұмыстары талқыланды.
Жиын қорытындысында Асайын Байханов мемлекеттік органдардың жұмысы орындаушылық тәртіпке, шешімдердің сапасына және тапсырмалардың уақытылы орындалуына тікелей байланысты екенін атап өтті.