Жөндеу науқанына байланысты аймақтағы көлік қозғалысына уақытша шектеулер енгізіледі, деп хабарлайды @Pavlodarnews.kz тілшісі.

«ҚазАвтоЖол» ҰҚ» АҚ баспасөз қызметінің мәліметінше, өңірде жол инфрақұрылымын жаңарту аясында республикалық маңызы бар «Атамекен – Ақсу – Көктөбе – Үлкен Ақжар – Курчатов» автожолының 15 шақырымдық учаскесінде орташа жөндеу жұмыстары жүргізілуде. Қайта жаңарту жобасы Атамекен кентінен Ақсу қаласындағы МАЭС теміржол өткеліне дейінгі аралықты қамтиды.

Сондай-ақ 15 мамыр мен 4 маусым аралығында Ақсу қаласындағы МАЭС теміржол жолөткізгішінің деформациялық жіктерін жөндеуге және 5-20 маусым күндері «Нұрлы жол» көпірінің көлік айрығында жөндеу жұмыстарына байланысты автокөліктерге бір жолақ бойынша реттелетін реверсивті қозғалыс енгізіледі.

Мамандар жол-көлік оқиғаларының алдын алу мақсатында жүргізушілерден жылдамдық режимі мен қауіпсіз арақашықтықты қатаң сақтап, орнатылған уақытша ескерту жол белгілерінің талаптарына мұқият болуды сұрайды.