Өңірде веломаусымның ашылуына байланысты тәртіп сақшылары екі дөңгелекті көлік тізгіндеген тұрғындарға үндеу жолдады, деп хабарлайды @Pavlodarnews.kz тілшісі.

Облыстық полиция департаменті баспасөз қызметінің мәліметінше, қарапайым қағидаларды сақтау жарақаттану қаупін айтарлықтай төмендетеді.

Велосипедшілер үшін ең басты талаптың бірі – көріну мүмкіндігін арттыру. Ол үшін киімге жарық қайтарғыш элементтер тағып, көлікке ақ және қызыл түсті шамдар орнату қажет. Сондай-ақ, қорғаныс дулығасын кию – жай ғана формальдылық емес, адам өмірін сақтап қалатын маңызды фактор.

Жол қиылыстары мен жаяу жүргіншілер өткелінде ерекше сақ болу ескертілді. Ереже бойынша, жолды кесіп өткенде велосипедтен түсіп, оны жетектеп өту міндетті. Бұл автокөлік жүргізушілеріне адамды дер кезінде байқауға мүмкіндік береді.

Сонымен қатар, полицейлер жол үстінде құлаққап қолданбауға шақырады. Себебі айналадағы дыбыстар мен көлік сигналдарын есту қауіптің алдын алуға көмектеседі. Қозғалыс кезінде күрт маневр жасамай, бұрылатын немесе тоқтайтын кезде қолмен белгі беру де маңызды.

Полиция департаменті жол қозғалысы ережелерін сақтау – әрбір азаматтың ортақ қауіпсіздікке қосқан үлесі екенін атап өтті. Тәртіп сақшылары тұрғындарды өз денсаулығына жауапкершілікпен қарауға шақырды.