Іс-шара Гиннестің рекордтар кітабына ресми тіркеледі , деп хабарлайды @Pavlodarnews.kz.

30 тамызда Павлодар қаласында Қазақстан Республикасының Конституциясының 30 жылдығына арналған мәдени-көпшілік іс-шаралар өтеді. Мереке аясында ерекше оқиға жоспарланған — ел тарихында алғаш рет көлемі 16 × 8 метр болатын Қазақстанның Мемлекеттік Туы дронның көмегімен көкке көтерілмек.

Бұл Ту осы айтулы датаға арнайы дайындалды. Жүк көтергіштігі 120 килограмм болатын бір дрон туды 180 метр биіктікке көтеріп, Павлодар қаласының орталық жағалауында орналасқан бас сахна — «Ertis Promenade» үстінен алып өтеді. Дәл осы сәтте сахнада Қазақстан Республикасының Мемлекеттік Әнұраны орындалады.

Бастама авторы — облыстық «Шаңырақ» халық шығармашылығы және мәдени-сауық қызметі орталығы. Аталған іс-шараны Гиннестің рекордтар кітабына ресми тіркеу үшін өтінім берілді. Жоба Павлодар облысы әкімдігінің және облыстық мәдениет, тілдерді дамыту және архив ісі басқармасының қолдауымен жүзеге асуда.

– Бұл жобаны біз тек рекорд орнату мүмкіндігі ретінде ғана емес, ұлттық бірліктің және қазақстандық патриотизмнің символы ретінде қарастырамыз. Жас ұрпақ үшін бұл Отанға, халқына және Мемлекеттік рәміздерге деген сүйіспеншілікті айқын сезіндіретін жарқын белгі болмақ, — деп атап өтті «Шаңырақ» орталығының директоры Замира Солтанова.

Рекордты ресми тіркеу үшін Павлодарға WBR (Дүниежүзілік рекордтар кітабы) Азия және Африка елдері бойынша рекордтарды тіркеу жөніндегі бас офицер Қуандық Құдайбергенов келеді.