Шараға жүзге жуық оқушы мен студент қатысып, ішкі істер органдарының жұмысымен танысты, деп хабарлайды @Pavlodarnews.kz тілшісі. 

Іс-шара барысында жастарға заманауи бейнебақылау құрылғылары, қару-жарақ түрлері мен қызметтік иттердің дағдылары көрсетілді. Шараға қатысқан Б. Ахметов атындағы педагогикалық колледж студенті Айсауле Мұхамед алған әсерімен бөлісті.

– Маған ашық есік күні өте қатты ұнады. Әсіресе, иттердің көрсеткен трюктары ерекше әсер қалдырды. Егер болашақта мамандығымды ауыстыратын жағдай болса, дәл осы салаға түскім келеді, – дейді Айсауле.

Павлодар қаласы патрульдік полиция батальоны взвод командирінің орынбасары, полиция капитаны Елжас Қалиевтің айтуынша, мұндай ашық есік күндері әр ай сайын ұйымдастырылатынын атап өтті. 

– Іс-шараның басты мақсаты – жастарға полиция қызметін ашық түрде көрсету. Олар болашақта мамандық таңдағанда осындай танысудың пайдасы зор. Биыл бізде жаңа технологиялар енгізіліп, бірқатар талаптар жаңартылып жатыр. Осы бағытта да оқушыларға кеңінен ақпарат берілді, – деді ол.

Әлихан Бөкейхан атындағы лицей мектебінің мұғалімі Қарлығаш Айтжанова да шараның маңыздылығына тоқталды.

– Бұл іс-шара оқушыларға өте қатты ұнады. Көңіл-күйлері жақсы, қызығушылықтары жоғары. Осындай кездесулер олардың болашағына бағыт береді деп ойлаймын, – дейді ұстаз.

Ашық есік күніне келген жастардың көбі полиция қызметіне деген қызығушылықтарының артқанын айтып, болашақта осы салада қызмет еткілері келетінін жеткізді.

Жансая Мәлік