«Fight Nights Global» шарасының ұйымдастырушылары бокс кешінің өтетін жерін, уақыты, мен билет бағасын айтуға дайын, деп хабарлайды @Pavlodarnews.kz тілшісі.

Павлодардағы бокс кешінің осы және басқа да көптеген жайттары туралы «Fight Nights Global» промоутерлік компаниясының президенті Камил Гаджиев айтып берді. Оның айтуынша, мұндай ауқымды шараны қаламызда өткізу идеясы кездейсоқ туындамаған.

- Павлодар бокс дәстүрлері бар қала, оның үстіне Фаниль Рафиков сіздердің қалаңыздан екені белгілі болды. Сол себепті оның қатысуымен турнир ұйымдастыру Павлодарға бұйырды. Жұртшылық Фанильді, басқа да жергілікті жігіттерді де қолдауға келетінін білдік. Бұл кеште өнер көрсететін Жалғас Жұмағұловты көруге жанкүйерлер де келеді деп ойлаймын, - дейді Камил Гаджиев.

Ұйымдастырушының айтуынша, бокс кеші он жекпе-жектен тұрады: Фаниль Рафиков пен Ахмед Әлиев арасындағы жекпе-жектен бөлек, рингке Жалғас Жұмағұлов, сондай-ақ қазақстандық жас былғары қолғап шеберлері шығады. Оның үстіне жекпе-жектердің бірі боксшы қыздар арасында өтеді.

– Бізге бірнеше арена ұсынылды, бірақ олар сыйымдылық талаптарына сай болмады. Кешті кең ауқымда өткізгіміз келеді. Кеш шамамен төрт сағатқа созылып, «Qazsport» телеарнасында жеті-сегіз жекпе-жек көрсетіледі. Бұл тартысты жекпе-жектер болады. Көрермендерді қазір алдай алмайсың: туған жеріне қайдағы жоқ белгісіз біреулерді ұрып-соғуға әкелген ешкімге де қызық емес. Бұл жолы олай болмайды, - деді Камил Гаджиев.

Сондай-ақ Камиль Гаджиев жекпе-жек уақытын, сондай-ақ билеттердің шамамен бағасын айтты. Билеттер 2500 теңгеден, ал кеш 27 ақпанда 18.00-де басталмақ. Егер бәрі жоспарға сай болса, Павлодарда мұндай бокс кештерін жыл сайын өткізуге болар еді.