Докторантының пікірінше, бұл Жолдау – жаһандық тұрақты даму тәсілдерін қайта қарауға белгі болмақ, деп хабарлайды @Pavlodarnews.kz тілшісі.

Қазақстан Президенті Қасым-Жомарт Тоқаев жыл сайынғы халыққа Жолдауында жасанды интеллекттің дамуы мен жаһандық цифрлық трансформацияға байланысты заманауи сын-қатерлерді атап өтті. Мемлекет басшысының «Жасанды интеллект дәуіріндегі Қазақстан: өзекті міндеттер және оларды цифрлық трансформация арқылы шешу» атты баяндамасы әлемдік геосаясаттағы терең өзгерістерді талқылауға бастау болды.

Президенттің пікірін қазақстандық ғылыми және қоғамдық орта өкілдері де қолдайды. Л.Н. Гумилев атындағы Еуразия ұлттық университетінің Қазақстан халқы Ассамблеясы кафедрасының докторанты Борис Поломарчуктың айтуынша, шығыс сарапшылары бұны бұрыннан ескерткен: тарихына, дәстүрі мен құндылықтарына құрметсіз жасанды толеранттылық тұрақтылықты қамтамасыз ете алмайды.

– Шығыс әрқашан прагматизммен және дәстүр мен заманауи сын-қатерлерді үйлестіре білумен ерекшеленді. Шығыс мәдени дәстүрлер – архаизм емес, қоғамның тұрақтылығының негізі екенін түсіндіруге тырысты. Бүгінгі таңда бұл негіздер жаһандық деструктивті күштердің қысымымен жедел бұзылуда, – деді Борис Поломарчук.

Күшейіп келе жатқан жаһандық сын-қатерлер аясында азаматтық дипломатияның маңызы артып келеді. Бұл – қоғамдар арасындағы сенімді нығайтып, қақтығыстардың алдын алуға мүмкіндік беретін диалог құралы. Саясаттанушы дәстүрлі дипломатиялық тәсілдер тығырыққа тірелген жағдайда, халық дипломатиясы геосаяси апаттардан сақтандыратын «халықтық сақтандыру» бола алады деп санайды.

Президенттің сөзі Еуразияның, соның ішінде Қазақстанның, жаңа әлемдік тәртіпті қалыптастырудағы артып келе жатқан рөлін айқындайды. Бай тарихи-мәдени мұрасы мен прагматизмге адалдығы бар Қазақстан батыс елдеріндегі ішкі мәдени дауларға шырмалған көзқарастарға қарағанда болашаққа әлдеқайда байыпты және теңгерімді көзқарас ұсына алатын ел ретінде көрініп отыр.