Құқық бұзушы тәртіптік жазаға тартылды, деп хабарлайды @Pavlodarnews.kz тілшісі.

Павлодар облысының ормандары тұрақты түрде заңсыз ағаш кесуге ұшырайды. Бұған ресми статистика дәлел: соңғы бес жылда 216 оқиға тіркеліп, нәтижесінде екі мың шаршы метрден астам орман қоры жойылып, келтірілген шығын 65 миллион теңгеге бағаланып отыр.

Павлодар облысы бойынша сыбайлас жемқорлыққа қарсы қызмет басшысының орынбасары Әсет Оспанов жақында «Ертіс орманы» Шалдай филиалында 12 миллион теңгеге тұқым жетіспеушілігі анықталғанын хабарлады.

Оқиға Шарбақты полиция бөлімінде тіркелді.

– Қорықтың өзі тұқым жинаумен айналысады, бүршіктерден тұқым алынатын құрылғы бар. Осыған жауапты адам тұқым өнімінің көлемін жасанды түрде арттырған. Тұқым шығарудың нақты көлемі 0,4 келі болса, оны қағаз жүзінде 0,8 келі деп шығарған, – деді спикер.

Полицияға ұрлық туралы хабар түскендіктен қылмыстық іс қозғалды. Бірақ тергеу барысында тұқым санының жасанды түрде көбейтілгені анықталды. Жетіспейтін көлем 49 келіге бағаланып, шығыны 12 миллион теңгені құраған. Құқық бұзушы тұқымды өз қаражатына сатып алып, жетіспейтін мөлшерін қайтарған.

– Ұрлық фактісі дәлелденбегендіктен, ұрлық бойынша қылмыстық іс жабылды. Құқық бұзушы тәртіптік жазаға тартылып, басқа қызметке ауыстырылды, – дейді сыбайлас жемқорлыққа қарсы күрес департаментінің профилактикалық бөлімінің аға офицері  Данияр Қамзин.

Жалпы айтқанда, ерекше қорғалатын табиғи аумақтар саласындағы сыбайлас жемқорлық тәуекелдеріне жүргізілген сыртқы талдау нәтижелері бойынша сыбайлас жемқорлыққа қарсы қызмет 35 ұсыныс енгізді, оның үшеуі орындалды, қалғандары орындалу үстінде.