Ұрлық жасады деген күдікпен 22 жастағы жігіт құрықталды, деп хабарлайды  @Рavlodarnews.kz.

Облыстық полиция департаменті баспасөз қызметінің мәліметінше,  криминалдық полиция басқармасының қызметкерлері «Hi-tech» профилактикалық іс-шарасын өткізу барысында жас жігітті анықтады. Ол ақпараттық жүйеге заңсыз қол жеткізу арқылы ұялы телефонынан айырылған 59 жастағы ер адамның шотынан 700 мың теңгеден астам ақша ұрлығын жасады деген күдікке ілінді. 

 –  Қала тұрғыны табылған телефонның құпия сөзін таңдап, мобильді банкинг арқылы тауарлық несие рәсімдеген. Тауарды алғаннан кейін тауарды қайта сату арқылы қолма-қол ақша алған,  – деді департаментте. 

Аталған дерек бойынша Қазақстан Республикасы ҚК 188-бабы 4-тармағының 2-бөлігіне сәйкес – «Ақпараттық жүйеге заңсыз кіру арқылы ұрлық жасау» тергеу әрекеттері жүргізілуде. 

Павлодарлық жедел уәкілдер «Hi-tech» жедел профилактикалық іс-шарасын өткізу нәтижесінде интернет-алаяқтық бойынша күдіктілердің бесеуін анықтады. Барлық фактілер тіркеліп, Қазақстан Республикасы ҚК 190-бабы 4-тармағының 2-бөлігі бойынша сотқа дейінгі тергеу жүргізілуде, үш адамнан еркін айналымда тыйым салынған өнім (контрафактілік өнім) алынды. Интернет пайдаланушыларға қатысты бұрын жасалған алты қылмыс ашылды.

Еске сала кетейік, 25 жастағы қыз алдау жолымен  82 жастағы зейнеткердің үйінің кіреберісінде 2,5 млн теңге сомасында ақша қаражатын иеленгені анықталды.