Полицейлер әйелдің мұз кесегінен жарақат алуына байланысты оқиғаның мән-жайын анықтады, деп хабарлайды @Pavlodarnews.kz тілшісі.

Облыстық полиция департаментінің мәліметінше, жедел тексеру барысында оқиғаға 12 жастағы қыздың қатысы бары анықталған.

– Белгілі болғандай, жасөспірім балконда тұрған кезде мұз кесегін сындырмақ болған. Алайда мұз қолынан абайсызда шығып кетіп, төменге құлап, сол сәтте өтіп бара жатқан әйелге тиген. Оқиғадан кейін балалар болған жағдай туралы ересектерге айтпаған және оны ата-аналарынан жасырған, – деді ведомствода.

Департаментте атап өткендей, кәмелетке толмаған баланы тәрбиелеу жөніндегі міндеттерін тиісінше орындамағаны үшін оның заңды өкілдері әкімшілік жауапкершілікке тартылды. Ата-анасы болған оқиғаны мойындап, өкініш білдірген.

Тәртіп сақшылары ата-аналарды балаларға қауіпсіздік ережелерін үнемі түсіндіріп, өзге адамдардың өмірі мен денсаулығына қауіп төндіруі мүмкін әрекеттерге жол бермеуге шақырды.

Еске салайық, 8 шілдеде Павлодардағы тұрғын үйлердің бірінің ауласында баласымен серуендеп жүрген әйелдің үстіне мұз кесегі құлаған болатын. Зардап шеккен әйел ауруханаға жеткізіліп, басына тігіс салынды. Осы дерек бойынша қылмыстық іс қозғалып, оқиғаның мән-жайын анықтау үшін тергеу басталған еді.