Жаһандық кеңжолақты және мобильді байланыстың сапасын бағалайтын Ookla компаниясы шілде айындағы Speedtest Global Index есебін жариялады, деп хабарлайды Kazinform АЗЕРТАДЖ-ға сілтеме жасап.

Әзербайжанның Ақпараттық-коммуникациялық технологиялар агенттігінің мәліметінше, елдегі тіркелген кеңжолақты интернеттің медианалық жылдамдығы 92,52 Мбит/с, ал мобильді интернет жылдамдығы 99,53 Мбит/с болды.

Жылдық көрсеткішпен салыстырғанда тіркелген кеңжолақты интернет жылдамдығы 9,43 Мбит/с-қа (11,35%), ал мобильді интернет жылдамдығы 24,96 Мбит/с-қа (33,47%) артқан.

Бакуде шілде айында тіркелген кеңжолақты интернеттің медианалық жылдамдығы 92,65 Мбит/с, ал мобильді интернет жылдамдығы 121,54 Мбит/с болды. Бір жылда елордадағы тіркелген интернет жылдамдығы 11,13%-ға, мобильді интернет 31,85%-ға өскен.

Мамандардың пікірінше, интернет жылдамдығының артуы елдегі цифрлық трансформацияның, электронды қызметтерге сұраныстың және қашықтан жұмыс істеу мен білім алу мүмкіндіктерінің кеңеюін көрсетеді.