Еліміз Орталық Азиядағы жетекші туристік бағыт ретіндегі мәртебесін нығайтып келеді, деп хабарлайды @Pavlodarnews.kz тілшісі Дүниежүзілік экономикалық форум деректеріне сілтеме жасап.

Қазақстан халықаралық туристік аренадағы өз позициясын нығайтуды жалғастыруда. Соңғы бес жыл ішінде ел Travel & Tourism Development Index рейтингінде 28 сатыға жоғарылады.

Оң өзгерістерді басқа да халықаралық зерттеулер растап отыр. Атап айтқанда, U.S. News & World Report рейтингісінің «Туризм және мәдениет» санаты бойынша Қазақстан 2025 жылдың қорытындысында 73-орынға ие болып, үш жыл ішінде өз көрсеткішін бірден 11 позицияға жақсартты.

Туристік тартымдылығы жағынан Қазақстан Катар, Бахрейн, Тунис және Вьетнам сияқты бірқатар елдерді басып озды. Сарапшылар мұндай өсімді туристік инфрақұрылымның дамуы, ішкі және келу туризмі мүмкіндіктерінің кеңеюі, сондай-ақ елдің табиғи және мәдени мұрасын тиімді насихаттаумен байланыстырады.

Қазақстанның туристік әлеуеті зор. Ел аумағында бірегей табиғи ландшафттар мен ұлттық парктерден бастап, Ұлы Жібек жолының тарихи нысандары мен заманауи қалалық бағыттарға дейін көптеген тартымды орындар бар. Саяхатшылар арасында әсіресе Алматының таулы өңірлері, Алакөл көлі, Бурабай, Маңғыстау облысы және басқа да туристік аймақтар үлкен қызығушылық тудырады.

Бүгінде Қазақстан шетелдік туристерді көбірек тарту және туристік саланы дамыту үшін қолайлы жағдайлар жасап, Орталық Азиядағы ең перспективалы туристік бағыттардың бірі ретінде өз имиджін қалыптастырып келеді.