АЭС құрылысы бизнестің дамуына зор серпін береді – Райымбек Баталов

АЭС құрылысы бизнестің дамуына зор серпін береді – Райымбек Баталов
Фото: «Атамекен» ҰКП басқармасы

Үкімет Қазақстанда атом электр станциясын салу туралы бастама көтерді, деп хабарлайды  @Pavlodarnews.kz тілшісі. 

«Атамекен» ҰКП басқармасының төрағасы Райымбек Баталов алдымызда еліміздің одан әрі экономикалық, саяси және әлеуметтік дамуының векторын айқындайтын маңызды таңдау тұрғанына тоқталды. 

–  Референдум қарсаңында еліміздің бірнеше өңірлерінде қоғамдық тыңдаулар өтті. Мамандар бұл тақырыпты қызу талқылап, түрлі пікірлерін білдіруде. Олардың көпшілігі Қазақстанның бейбіт атом энергиясынан қуат алатын алпауыт ел болғанын қалайды. Ел болашағын айқындайтын жауапты шешімнен Ұлттық палата да шет қалмады. Біз әлемдік тәжірибеге, осы саладағы ғалымдар мен мамандардың – сала мамандарының дәлелдеріне сүйенеміз, – деді Райымбек Баталов.

Сондай-ақ ол «Атамекен» сарапшылары түрлі алаңдарда өз ұстанымдарын дәлелдеп келетінін және ұлттық палата Үкіметтің бұл бастамасын толығымен қолдайтынын атап өтті. Сондай-ақ атом электр станциясының құрылысы отандық бизнестің дамуына қуатты серпін беретініне нық сенім білдірді.

Бұдан бөлек, басқарма төрағасы қысқаша бірнеше маңызды аспектілерге тоқталды: 

Біріншіден, АЭС тұрақты энергиямен қамтамасыз ететін негізгі көз болып табылады. Бұл – бизнесті дамытуға керемет мүмкіндік. Әсіресе, тау-кен және металлургия, машина жасау, өңдеу өнеркәсібі, құрылыс және басқа да көптеген энергияны қажет ететін салалар үшін маңызды.

Жалпы, шағын және орта бизнес көміртекті бейтараптықты табысты іске асыру үшін электр энергиясын жеткізуді қажет етеді. Елімізге барлық шикізаттық емес салаларды әртараптандыру қажет. Бірінші кезекте – бұл жаңартылатын энергетика және атом энергетикасы үшін таза энергияның базалық генерациясына айналуы мүмкін. Аталмыш саланы қолға алу – біздің экспорттық өнімді сатуға арналған көміртегі салығын азайтуға мүмкіндік береді.

Екіншіден, АЭС салу және пайдалану ілеспелі салалардың дамуын ынталандыратын озық технологияларды, соның ішінде ІТ және инновациялық шешімдерді енгізуді талап етеді. Соңғы екі жылда мамандар Түркия және басқа да өңірлерге барып, шағын, орта және ірі бизнестің жаңа технологиялармен жұмыс істеудің қыр-сырын меңгеріп келді.

Үшінші маңызды аспект – жұмыс орындарын құру және адами ресурстарды дамытуға байланысты. Осы тұрғыда білім беру мәселесін де айта кеткен жөн. Жоғары технологияларды меңгеру шағын, орта және ірі бизнестің дамуына сөзсіз серпін береді.

Райымбек Баталов бұл шешімді қолдайтынын және экономикамның дамуына елеулі мультипликативтік әсер беретініне сенім білдірді.