Денсаулық сақтау басқармасына жөндеу жұмыстарына арналған жобалық-сметалық құжаттаманы әзірлеу тапсырылған, деп хабарлайды @Pavlodarnews.kz тілшісі.

Аққулы ауданында орталық аудандық аурухананың материалдық-техникалық базасын нығайту және медициналық қызмет сапасын арттыру бағытында жүйелі жұмыстар жүргізілуде. Бұл туралы аудан әкімі Руслан Мұқанов мәлімдеді.

– Ағымдағы жылы аудандық ауруханада ішкі су құбыры мен кәріз желілері, жылыту және желдету жүйелері күрделі жөндеуден өтті. Аталған жұмыстарға 400 миллион теңгеден астам қаражат бөлініп, қазіргі таңда жөндеу толық аяқталды, – деді аудан басшысы. 

Сонымен қатар медициналық мекеменің жабдықталу деңгейін арттыру мақсатында үш санитарлық көлік, электрокардиографтар, функционалдық мобильді төсек, фетальды монитор, сондай-ақ операциялық бөлмеге арналған заманауи медициналық жабдықтар сатып алынған.

Бүгінде аудандық аурухана 26 дәрігермен және 74 орта буын медицина қызметкерімен толықтырылған.

– Биыл мекемеге үш жаңа дәрігер – акушер-гинеколог және екі жалпы тәжірибелік дәрігер жұмысқа қабылданды. Дегенмен, қазіргі уақытта эпидемиолог, жалпы тәжірибелік дәрігер және терапевт мамандықтары бойынша кадр тапшылығы сақталып отыр, – деді Руслан Мұқанов. 

Облыс әкімі Асайын Байхановтың тапсырмасына сәйкес, келесі жылы аудандық аурухананы толық көлемде күрделі жөндеуден өткізу жұмыстарын бастау жоспарлануда. Осыған байланысты денсаулық сақтау басқармасына жөндеу жұмыстарына арналған жобалық-сметалық құжаттаманы әзірлеу тапсырылған.

– Қазіргі таңда бұл мәселе басқармамен бірлесіп қарастырылуда. Денсаулық сақтау басқармасы жасаған техникалық қорытындыға сәйкес, жобаны әзірлеу үшін 41 миллион теңге көлемінде қаржы қажет. Жобалау жұмыстары келесі жылы басталып, оны іске асыру екі-үш жылға жоспарланып отыр, – деді әкім. 

Айта кетейік, аудандық аурухана үш қабатты, жалпы аумағы 2000 шаршы метрді құрайды және 40 адамға дейін қабылдау мүмкіндігіне ие. Алдағы күрделі жөндеу жұмыстары аурухананың инфрақұрылымын жаңартып, аудан тұрғындарына көрсетілетін медициналық қызметтің сапасын арттыруға бағытталмақ.